RIAKMAW IANG DAMLAI HRINGNUN

Vanhnuaikhuma

He thu ka ziah hah man hi tu mân min pe lo va, ka phût bawk hek lo. He thu ziak tûr hian tu mân ka beng bulah se se thu dî min hlân lova, eng hla thu ril mah min fah bawk hek lo. He thu ziak tûr hian min ti mah suh se, ziak lo thei lovin chu putar mittui chuan min cho chhuak a. A man pein min leisak dâwn ni ula, eng zâta tam pawhin a man chuang hauh lo vang.

Putar kum 83 mi nên chuan kut thing meuhin kan inchibai lâwp lâwp a, a hmêlah hlim hmêl pu siin lungchhiatna sâr a zâm a, insûm theihna tlachham tih hriat takin lehlam a hawi a, a mittui chu a hru zauh zauh ta mai! A khawhar thu leh a lunglên thu te a sawi lai chuan, kei, mi tlâktlâi lo ber hian eng vânga hnemna thu chhâk chhuak thiam lo nge ka nih? Keimah hi ka inten a, ka inhua a, eng vangin nge tawngkam thiam lo tûra Pathianin min siam, ka vanduai mang e tiin ka rûm vawng vawng a ni. Ka pain hnêmtu a mamawh êm êm laia ka kha a chih tlatte kha thlarau sual hnathawh ti ngam chiah lo mah ila, thlarau thianghlim hnathawh zawng a ni hauh lo vang. A riang ngawih ngawih a, a damlai nun chu zinkawng khawhar takah hmangin, zîng leh zân hi a tân a dang lova, thlasik leh nipui hian a thinlungah pawimawhna a nei hrang chuang bawk hek lo. Chu putar chu ka Pa (ka Ni pasal) a ni.

Ka thianpa nên kan thlenna in (ka u, ka Ni fanu) lam panin dâr 9:30 pelhah kan inzui haw hnak hnak a. In kan luh dâwn chuan ka pa rawn chhuak tûr nên kan intâwk a, “Zânin chu i rawn riak dâwn em?” tiin min zâwt hâ a (heti anga zan rei hi a meng ngai lo, zîng takah a tho va, kawtthlêrah kalin a insawizawi thin). Min lo la nghâk reng a ni tih ka hriat chuan zahawm ka ti hle a, ka rilru pawh a buai kher mai. A zan khatna atanga ka thianpa riah chhuahsan chu ka hreh hle a (ka bula rawn thleng ve a ni si a). Ka pa min sâwmna chu hnial chi niin ka hre lova, mahse, hnial lo thei lo dinhmunah ka ding bawk si. “Naktûk zânah ka rawn riak mai dâwn nia aw” tiin hreh tak chungin ka insawi fel thei ta hrâm a, lungawi vak lova ina a lût lai en chu hrehawm ka ti kher mai.

Ka Ni (ka Pa u) hian Oct. 12, 2010 khân kum 77 mi niin khawvêl a chhuahsan a. Ka pa hi sipai pensioner a ni a, tihian a nung ve tâwk tâwk a ni. Chutia khawhar taka a awm lai chuan kei ve hi min thlahlel ngawih ngawih a, a bula awm tûrin min duh a, nimahsela, ka thei si lo. Ka thlen tlaia ka va lên chuan ani patling, kum 83 meuh pawh a insûm zo lo a nih chu! “I ni chu la dam se chuan aw! A va duat dâwn che em! Nimahsela, tûnah chuan duattu pawh i nei tawh si lo. Kei lah hi tihian mal takin ka awm a, ka khua hi a har êm êm thin a ni” tiin min hrilh malh malh a. Ka tân engmah a ui lova, min tihsak a châk êm êm zâwk a ni tih ka hriatin atân eng nge ka tihsak ve ang tih ka ngaihtuah neuh neuh thin.

Ka thiante chuan zâna haw an ti ta thut mai. Kei lah ka pa hnêna riak tûra ka lo intiam zân chiah a ni bawk si a, ka mang a ang kher mai le. Chuti chuan rilru helhkam nei rêng rêngin hun ka hmang a, kâwla ni a liam dâwn chuan haw ve lo tûrin thutlûkna ka siam fel thei ta hrâm a ni. Ka thiante chuan min chuk malh malh mah se, na ka ti hran lova, pawi pawh ka ti bawk hek lo, a aia pawimawh tihtûr ka nei tlat alâwm.

Zânah chuan a inah ka riak ve ta ngei a, a lâwmna aiin ka lâwmna chu a nêp bîk hauh lo vang. Zîngah chuan ka thawh hmain a tho va, insawizawiin a lo chhuak daih mai a. Ka haw a hun tawh si, ka u pasalin min va thlah a, ka pa chu râl khata a kal lai chiah ka hmu ta! A rawn haw hman a inring a ni ngei ang, nimahsela, a rawn thleng hman ta si lo. In a thlen chuan engtin tak ngai ang maw?

Posted in: Hringnun