Monday, June 20, 2016

GIDEONA (Roreltute 6 – 9)



Israel faten Kanaan ram an luh dâwna a rama lo chêng hmasa te kha Pathianin ti chimit vek turin a ti a. Mahse, khaw 18-a awm Kanaan ho chu an hnawt chhuak lo a, an chhiahhlawh atân te an chhawr ta zâwk a. Lalpa vantirhkoh chu Gilgal atangin Bokim khuaah a han chho a, Israel faten Pathian thu an zawm loh avanga Kanaan ho chu an nâkah hlîng ang leh an pathiante chu an tân thang ang a nih tur thu a hrilh a.

Hun a lo kal a, Israel fate chuan Pathian an theihnghilh ta a, an bula awm pathian dangte chu an be ve ta a. Vawi tam tak Pathian an hawisan hnu-in Lalpan Midian-ho kutah kum 7 a awmtir a. Israel faten thil an chîn te hian Midian-hote leh Amalek-hote chu an han chho a, an thlai chin te leh an ran vulh te chu an han chîl chhiatsak thin.

Chutia hrehawm taka kum 7 an awm hnu chuan Israel fate chuan Pathian an au ta a. Pathianin an au thâwm a lo hria a, a vantirhkoh tîrin chhanchhuaktu a pêk tur thu a hrilh a. Joasa fapa, Gideona (Jerubaala), Ophra khuaa Abiezrit mi chuan grep sâwrna khurah buh a lo vua a. Lalpa vantirhkoh chu a lo kal a, ani chuan “Nang mi chak huaisen, Lalpa chu i hnênah a awm e,” (Roreltute 6:12) a ti a. Gideona chuan “... Ngai teh, Manasea thlah zingah hnam rethei ber kan ni a, kei lah hi ka pa chhungte zinga tê ber ka ni si a,” (Roreltute 6:15) a ti a. Lalpa chuan, “I hnênah ka awm zêl dâwn alawm,” a ti a.

Gideona chuan Lalpa ngei a nih leh nih loh fiah nân kel no leh chhangphut a han la a, lungpui chungah a dah a, vantirhkoh chuan a tiang ken hmâwr chuan sa leh chhang dawidim telh loh chu a han dek a, lung atang chuan mei a lo chhuak a, a kâng ral ta vek a. Gideona chuan, “Lalpa vantirhkoh chu a hmai chhanah ngei ka hmuh tâk chu le,” (Roreltute 6:22) a ti a. Chumi hmun hmingah chuan Jehova-Salom (Lalpan remna a rawn thlen-the Lord send peace / Lalpa chu remna a ni-Jehova of peace) a vuah a.

Chumi hnu chuan Gideona chuan huaisenna a lo nei a, Pathianin a hrilh angin zânah Baala maichamte chu a tichim a, Aseri te chu a kit ta a. Tichuan, Midian-hote, Amelek-hote leh khawchhak fate chu an pungkhawm chiam a, Gideona chu beih an tum ta a. Gideona chuan Pathian a bia a, fiahna a dîl leh ta a.

Midian-ho nên an inbeih dâwnin Pathianin Gideona sipaite chu a tihtlêmsak a. Hlau leh khur zawng zawng mi singhnih leh sanghnih an kîr leh a, sîngkhat an la awm. Singkhat pawh chu Pathianin tam a la ti a, zathumah a tihtlêmsak leh ta a.

Zanlaiah Midian-ho riah bûkah an zu kal a, an kut veilamin meichher an keng a, dinglamin tawtawrâwt an keng bawk a. Thâwklehkhatah hlum bêl an ken chu an tikeh sawm vek a, tawtawrâwt an hâm bawk a, ‘Lalpa leh Gideona ngunhnam’ tiin an au dur dur a. Midian-hote chu anmahni leh anmahni an inbei chiam a. Hnehna an chang ta a ni.

Gideona damchhung chuan Israel fate chu kum 40 chhûng ralmuangin an awm a. Israel fate chuan kan chungah ro rêl tawh ang che, nang leh i fapate chen pawhin an ti a. Mahse, Gideona chuan, “Kei zawngin in chungah hian ro ka rêl lo ang a, ka fapa lahin in chungah ro a rêl hek lo ang; Lalpan in chungah ro a rêl zâwk ang,” (Roreltute 8:23) a ti a.

Gideona chuan nupui tam tak a nei a, fapa sawmsarih a nei a, tar kûnin a thi a ni.

Kan nuna zir tur:
  1. Gideona hi rethei tak leh pachhe tak a ni. Chhuan tur rêng a nei lo a, a chhuan tur neih chhun chu Pathian chauh a ni. Pathian mithmuhah mi chak ni mah se, amah chuan chhuan tur rêng niin a inhre lo.
  2. Mi chak huaisen a ni. Pathianin mi chak huaisen a ti a. Hei hi ama thahrui leh theihna lam ringawt ni loin Pathian a rin tlatna vang zâwk a ni. Tu mah hi chak tâwk leh huaisen tâwk inti kan awm lo. Pathian hi kan chakna bul chu a ni.
  3. Hmai chhanah ngei Pathian a hmu. Mi thusawi atang te, mi testimony atang te chauha Pathian hi hria kan nih chuan kan inenfiah a tha hle ang. Gideona chuan hmai chhanah ngei Pathian a hmu a, a hmuhna hmun pawh Jehova-Salom tih a vuah nghe nghe a ni.
  4. Pathian a fiah. Bible-ah ‘I Pathian fiah suh’ (Deut. 6:16) tih awm mah se, Gideona chuan a hnêna Pathian inlâr chu a tak a nih leh nih loh hriat fiah a duh a, chu mai bakah indonaah chuan a chak ngei dâwn a ni tih fiahna a dîl a, Pathian chu vawi thum a fiah a, Pathianin a rintlâkzia a lantir a ni.
  5. Pathianah chauh a innghat. Sipai 32,000 a nei a; mahse, 31,700 chu a kîrtîr a, sipai 300 nên chauh Midian hote chu a bei ta a. Midian-ho leh Amelek-ho leh khawchhak fate chu 1,35,000 an ni. Mahse, Pathianin a awmpui a, a hneh ta tho a ni.
  6. Pathian rorelnaah a innghat. Israel fate khan an chunga rorêl turin an sâwm a. Mahse, a duh lo. Amah mai ni loin a fapa pawhin ro an rêlsak loh tur thu a sawi a, an chunga rorêl tur chu Pathian a ni tiin a hrilh a ni.

Châwl rih rawh



Mi taima leh zuan zâng tân chuan chawlh hi inhremna a tling hial âwm e. Mut kan thlâkhlelh viau laiin tho chhuak thei loa kan dam loh chuan dam nawmzia leh vanneihthlâkzia kan hrechhuak fo thin.

Kristiannaah hian chawlhna kan zawng a, taksa mai bâkah thlarau chawlhna hmun panin ni tin kan pên mêk zêl a ni. Chawlhna hmun thlen hlân kan nghâkhlel theuhin a rinawm.

Thahnemngaihna hi mihring atanga chhuak pawh a awm ve fo. Mihring mihrinna hian thil tam tak a ti thei a, mihring chakna hian khawvêl hi a sawi nghing fo thin. Mihring finna chuan Pathian meuh pawh a cho a, Babel in sâng avangin tawng hrang hrang kan lo neih phah ta a ni.

Theih tâwpin kan inhmang a, rawngbâwlna kawng tinrêngah kan phe a, a tangkai ber ber kan ni thin. A kûl a taia kan inhman lai hian mihring mihrinna chu chak takin a lo tlân ve mêk bawk si.

Hetih hunah hian a brake rah nachang hriat a pawimawh hle. Thahnemngaih luatah mi pawi sawi a hlauhawm a, chu mai ni loin Pathian pawi hial pawh a khawih theih asin. Chawlh det kan va mamawh êm!

Isua zirtirte kha mi tam takin an bawr buaia chaw takngial pawh an ei hman loh avangin Isuan thlaler hmuna kal hranga châwl rih turin a ti a nih kha (Marka 6:31).

Ni tin rawngbawlnaah kan buai êm êm a, hah takin kan hun a khat hle a ni thei. “Mi buai tak te hi mi lâk tlâk an ni thin,” ti fo mah se, kan buaina hi a dik tur a ni thung. Dik taka buai êm êm kan nih châng pawhin chawlh hlek hi kan mamawh thin.

Pathian pâwlna nun tam zâwk kan neih theih nân kan rawngbawlna tam takah hian chawlh hlek kan va mamawh tak êm! Kan hahin kan chau a, kan kulcho mai dâwn asin. Chawlh hlek a, chakna thar lâk nawn fo a tha hle. Mi chak apiangin chak nih an duh lo a, mi derdêp apiang chak emaw an inti fo.

Tisa leh thlarau nunah chak emaw kan intih a, kan rawngbawlna kawngah kan vung hle a nih chuan a brake rah kan ngai tan tihna a ni ang. Chawl hlek la, zawi muangin i kal leh dâwn nia. Chawlhbûkah Isuan a lo nghâk che a, i chakna avanga châwl phal loa i kalsan mai chuan i chakna beitham tak chuan a peih lohsan thuai dâwn che a ni. Chawlhna hmunah Isua nên inpâwl ula, chakna thar a pe ang che.


 
Design by Free WordPress Themes | Re-arranged by Lei hringnun