Thing chhia

Mathaia 7:17 leh Luka 6:43 kan en chuan “Thing tha apiang a rah tha thin a; thing chhia erawh chu a rah chhe thin,” tih ziak kan hmu. Thing tha nih kan duh theuhin a rinawm.

Thing tha hi a awmna leilungin a zir vang leh boruakin a zir vang a ni tlângpui. Lei tha leh tui duhtâwk an dawn avangin an thang duang a, hrisel tha takin an awm a, natna lakah pawh an him bik thin. Engkim duhthusam tluka tha an dawn avang chuan rah duhawm tak an chhuah tlângpui bawk.

Thing tha kan tih, no nêk nuak leh thang duang tak te hi thlipui leh ruahpui lakah an him lo fo. Harsatna eng emaw hlek a lo thlenin an zung a inkar phawng a, hmêl mawi tak ni siin an tlu leh ruah mai thin.

Thing chhia hi a awmna leilung leh boruakin a zir loh avangin a thang tha thei lo a. Chaw tha leh tui duh khawp a hmuh loh avangin a chawrche hle bawk. Mahse, heng thing, tlâng khawkrawk leh hmun chhengchhe taka inham tâng ve tâwk tâwk te hi an hmêl mawi lo mah se, an tlo a, thlipui leh ruahpui lakah an fei bîk hle.

Thing tha chu a ti a ngîl tha a, thing phurh atan duhthusam a ni. Eh a nuam a, meia tuah atan pawh a tha hle. Thing chhia erawh a ti a herh nasa a, eh pawh buaithlâk tak a ni.

Thing tha hi mawiin duhawm hle mah se, harsatna lakah a tlâwm fo. Chuti angin ringtu nunah thing tha anga dâwng hluah te hi harsatna chhe tê tê lakah an tlâwm fo a, an tlu leh mai thin. Rilrua a lan chânga phur hûrh leh thahnemngai ber ber anga lang, mite aia chang sâng bîk niawm taka phusa nasa te hian belhchian an dâwl lo fo.

Thing chhia anga zawi muanga thang lian, chawrche ve tak, thlipui leh ruahpui, rial leh thilnung tinrêng palzût hnu te hi ringtu tlo leh daih rei ber an ni thin. An ti hluah lêm lo, an phûl buah ngai lo, an ri bawrh bawrh hran lo; an rinna erawh nghet tak a ni thung.

Ringtu tha chu a danglam ve mai mai lo a, nghet takin a ding thin. Harsatna thlipui leh ruahpui pawh lo thawk mah sela, chhim leh hmar, chhak leh thlang zâwngin lên kûr dulh dulh mah se, a tliak duh ngai lo. Ringtu tha chu tunlai thil hian a tidanglam ve pha lo a, a zui Isua chu a hruaitu a ni a, a hniakah a rap a, a pênsan ngai lo. Chu mi chu miten thing chhe hmuhin an hmu fo si.

Read more »

40 +

KHUH HAWNNA

Hunbi chhiar dân hrang hrang awm bawk mah se, a chhiartute hian kan chhût sual a, chhiar dân thiam loh châng kan nei fo thin. Hringnun rahbi tin hi ‘ni thar’ tiin sawi mah ila, thenkhat chuan ‘ni ngai’ emaw kan ti a, a ‘tûr ve rêng’ emaw tiin lâwm nachhang kan hre lo fo. Kum hian puitlinna keng tel bawk mah se, naupang tê pawh a puitlin theih si chuan kum hi hunbi chhiarna chikhat chauh a lo ni. Kum tam apiang tar chuang hek lo i.

40 –

40 + kan sawi dâwna bilh tel ngai ziah chu ‘40 –’ hi a ni. A tel lo chuan nun a kim lo a, 40 + kaina rahbi a nih avangin tu man kan zuan khûm thei si lo.

Mithiamte chuan –

• Kum 20 i tlin hma chu zirlai naupang tha tak ni rawh. Tawn hriat nei tura inbuatsaihna hun pawimawh tak a ni.
• Kum 30 i tlin hma chu mi entawn tlâk leh mi tha hnung zui rawh. Company lian deuhah i thawk a nih chuan thil kalphung hriatna tha tak a ni ang a, khâwl lian pui pakhat i lo ni ang. Company tê deuha i thawh chuan phûrna i nei ang a, suangtuahna tha tak i nei thei ang a, tum khata thil tam tak tih i thiam bawk ang. Eng hna pawh thawk la, i hna aiin tu hnung nge i zui tih kha a pawimawh ber.
•  Kum 30 leh 40 inkar i nih chuan nge nge i nih tum thlan fel a hun tawh ang. I thutlûkna kha a pawimawh ber a, i awmdan tur thlan felna hun a ni.

Kum 20 pelh hnu-ah chuan mahni indah sânna a lo awm thin. Kum 25 vêl nih lai chuan tihsual hi nunphung emaw tih mai awl tak a ni. Beidawng hma mi tân chuan nun ram hi vahchap ang maiin a kâng duai duai thin. Kawng lehlamah dinchhuahna hun remchang tak a ni ve bawk.

Tlu la, tho leh la, tlu leh la, i nun kha hlimpui rawh. Hringnun hi a tawi a, tawn hriat chawp chi chauh a ni bawk si. Hmeichhiain kum 35 an pelh tawh chuan nau paina kawngah harsatna tawh a awlsam bîk hle.

Thenkhatin i hausa emaw an ti a, thenkhatin i hlawhtling viau emaw an ti a; mahse, nang lah chuan i nih lohzia i inhre chiang viau bawk si. Thenkhatin i rethei viauin an ngai a, hlauhawm viauah an ngai che a; mahse, i nih loh hrâm ka beisei.

Kan nun hi kan duhthlanna ang zela kal a ni si. Kan tap a, miten min hriatpui loh harsatna kan neih avangin. Naktuk chu sawi loh, nakin lek pawh kan thlîr thiam si lo. Mahse, nun hi heti mai hi a ni lo; 40 – nun a ni a, hmabâk a la tam asin.

40 I PÊL TA

I nih tur ang ang nih a hun tawh avangin thil thar hlak ngaihtuah tur chuan ka beisei lo che. Sawmli i thlen hmaa i thutlûkna kha bawhzui a hun tawh zâwk. Thil thar chu i zuan thei alawm, i hlawhtling thei bawk; mahse, thihna hian hmasial takin a lo hmuak tawh dâwn che a, hun hlu tam tak i nei tawh si lo.

Sawmli i pêl ta si a, lamhnai hmuh fiah theih lohna chuan a rawn hnaih telh telh che a. I hmuh fiah theih loh vang ni loin i bulah a awm reng a, i hmu si lo.

Aih

Tunhmaa i ngawih liampui mai ang kha i thei ta hauh lo. ‘Aw le’ i tih thin kha ‘aih’ i ti ta fo mai. Thil nihphung pangngai i ngaina a, tlêma danglam hlek chu i pai dai thei lo tial tial ta mai.

Na benvawn

Natna hi benvawn a tam rualin benvawn ni lêm lo na benvawn hi a awm ve hrim hrim. Sawmli pelh tawh chuan neuh neuh a tam a, na mang lo pawh na angah i chhâl fo ta mai. Hahthlâkin!

Thian tlêm te leh thian tha

Tunhma chuan thian tam tak neih kha insawi theih nan leh intihtheih nân i hmang thin a. Damchhûng chanve dâwn i lo hawlh tâkah chuan thian tam tak aiin thian tlêm te, rinawm tak neih i lo duh tan a. I sâwr zim tial tial ta thin.

A ho tial tial

Holiday leh hunpui chi hrang hrang ngaiah i neih a, a ho ta tial tial. Tunhmaa i thlâkhlelh êm êm thin te kha eng teh ualah i ngai ta lo. Hun hi a liam vut a, kum thar nghahhlelh chu sawi loh December ni 31 zân te phei chu liam lo hrâm se i ti ta vawng vawng mai.

A man leh hlutna

I ti tama i tawng tam. I tawng tama i hre tam. I hriat tam luatah engkim mai hi a man leh hlutna i chhût chhuak zêl bawk si. Thatna tam tak a neih laiin thenkhat tân chuan i ‘hahthlâk’ fo dawn a nia.

Tihpalh

Tleirawl lai chuan tihpalh tih hi sawi mai a awl a, 40 + hnu-ah erawh tihpalh tih hi sawi mai a har thung. I sawi tawhna chinah erawh i tihpalh tak meuh a ni a, i inthiam lo hle tihna a ni. Tihpalh tih hi i ka atanga thu chhuak tlang lian leh helh awl ber a lo ni ta.

Thawmhnaw

Neuh neuh a tam viau tawh na’ngin thawmhnaw ber hi a buaithlâk. A nalh leh mawi i duhna lamah a te te i hmu lian a, a kil kil i melh a, i keu kim thei fû zêl. A chuar chuar i pawt a, a mar mar i thlah dul thin. Sawi leh sêl a tam a, mahni ngaiha mawi aiin mi ngaiha mawi i zawng fo.

Nau neih mawlh hi

Tunlaiah luck loh vang pawh ni chuang loin nula tam takin pasal neih har an intihhmuh pawh ka ti chuang law. Thenkhat hi chu chhûngkuaah an vawk lal lên a, mi ina va awmpui chhuat nawh that leh vêl kha a peihawm loh ve bawk êm a ni. Lalthutthlêng kalsan a, chunga mite thu ngaichang renga ni va lên zawng a sawi pawh sawi suh.

Pasal nei nih ve si chuan chunglam malsawmna a chhia a tha; lu lawk, châwn puar, dul kiar pawh ni se fa han neih ve rêng rêng chu thil châkawm tak a ni lawi si. Mahse, 40 + chinah chuan harsatna hian thian tha a zawng ruai thin. Zun thlum, nau chhiat, thisen sâng leh vûng leh kaih, neih hun hmaa neih, hlam lama harsatna leh thi pût, thi saa piang leh buaina hrang hrang lakah i him lo tial tial ang.

Mipate pawh hi

Taksa a puitling a, a nghet tha tawh bawk. Thluak pawhin a theihna a thleng a, kan sawizawi that phawt chuan a nih tur ang a ni thei vek tawh. Mahse, nula lakah tenawm i ni thuai a, zak thei lo tia koh i nih pawhin zak duh miah suh u.

Naupan lai zawnga tih peih loh kha tih that leh i tum thin. Sum leh paiah i buai lo a, khawtlângah a tla tlum pâwl i ni bawk nên zahna chu i mangtha thiam hle. Amaherawhchu, i thil tihah rilru zawng zawng i pêk thin avangin depression lakah i him vak lo.

A tam zêl
Kum 50 nih tawh chuan lu-ah kêl sam a to pheuh pheuh a, thenkhat chal a ngalh tan bawk nên. Kum 60 tlin meuh chuan ruh te a lo zuai tan a, a chuktuah te pawh a lo thum zo ta. Nunphung thlâkna hun a awm tawh lo a, i hlimna tur ngaihtuah la, zalên takin awm tum rawh. Kum 70 râl kai meuh chuan ri a zawi tan ta. Kum 80 pelh meuh chuan tui in châkna a tlahniam a, tui in tlêm avangin taksain a tawrh phah a, tihrâwl a chak lo a, tar chhia kan ti tawh thin.

KHUH LÊTNA

Hringnun hi heti mai hi a ni si a. A rei lo a ni ti r’u? Chu a chhapah harsatna leh lungngaiha, buaina leh manganna tur hlîr a la ni zui. Kum 40 hnuai lam nih chuan vanglai nun kan la chên a, kan la TKP thei a, harsatna lung bang hi eng anga chang pawh ni se, sut ngam loh leh sut tlang zawh loh neiin kan inring ngai lo. Mahse, a rei a, keini pawh rial angin kan ral thuai thin. Kum 40 pelh tawh chuan rilruin pha mah se, tha-in a tlin lo a, ngaihtuahna harh tha viau mah se, taksa a lo chau tawh thin.

Chuvangin kan thatlai hian âm takin hun hmang ila, duhthawh takin damlai i chên ang u. Hei hi kan nun a ni a, hei hi kan hun a ni a, he khawvel hi kan ta a ni. Ropui takin piang lo mah ila, ropui taka vui liam nih i tum ang u. Chawimawina khum chungin tual lêng lo mah ila, chawimawina lallukhum khum thei turin van in mawi i thlîr tlat ang u.

Vanglai ramri kum 40 hi i pêl har dâwn lo. I bye bye thuai dâwn. Kum tam a la awm emaw i tiha kut lukhuma TV i en mai mai lai khân i kum 41-na birthday an lawmsak thuai ang che. ‘Eh’ pawh i ti hman dâwn si lo. Chumi hunah chuan rilru valai tak siin an ‘u’ ang chia, an ‘nu/pa’ ang chia, an ‘pi/pu’ hial ang che. Kum 40 i tlin hmaa khawvel hi ‘ka ta’ ti thin khân i râl thlir tawh ang. Rual pâwl thiam inti ve tak siin mi titi chu an hnungah i zui ang a, hrilhfiah chawpin i la nui ve mahna.

I vanglai hun a rei dâwn lo. Lalpa nên hlim la, Lalpa nên nui rawh. Naktuk hi vawiin a nih hunah chuan chal dawmin i kun mai dawn nge, i nui zâwk dâwn le?

Thu lâkna:
1. The Editors of Prevention ‘What It Takes To Change Your Life After 40’
2. The Telegraph, ‘The Secret Life of 40 year olds’ (09.11.2015)
3. Serdar Da, Dr., ‘Why Men Act Strangely After 40’
4. Trevor Stokes, ‘My Health News Daily Contributor’ (December 11, 2012)
5. www.parents.com
6. www.livescience.com
7. Midlife crisis & Ageing, wikipedia

Read more »

Mate, ni a sa

Zîng ni chhuak chu run thlâk khawpin a mawi a. Thîk tham khawpin zuk êng a. Kâwla a hmêl duhawm a rawn lan tirh lai chuan kan kawmthlanga hmeitha nu-fa chu an ri dûn nak nak a. An tûk tin dân a nih avangin khum atanga ngaithla reng chung chuan ka lo chhîng leh diar diar a.

Tuibur hmuam dâ êm pawh ka la chhîng hman lo, Pu Vana chuan a bêlpui hnûk ri dur durin rei pawh rial loin a rawn leih baw ta hawk hawk mai. Mut nuam tâwk hi chu a awm ve; mahse tûkin zet zawng thawh khân awm a nuam zâwk tlat.

 

Rial mu sep tê tê chuan dârthlalang rawn dêng ri tliar tliarin ngaihthat lohna tur ni si loin ruah lah chu a baw hawk hawk lehnghâl. Kawngkhâr rawn kik dat dat chu ka va hawng a, chanchinbu sem chu huh hneng hnuangin a lo ding a, a hna a nih avanga thawk ni mai loin a taimâkna zâwk kha ka ngaisang a, ka zah hle. “Nihliap i nei em?” ka tih chuan a lukhum hmathlâwk chu khawih pahin “Hei hi ka nihliap chu a ni mai,” a ti a, a nui sak a, ruah mal bum phei zak zak pah chuan a tlân liam leh ta a.

 

‘Bâng rawh u’ tih thâwm hre si loin thâwklehkhatah thehmeh ang takin a reh leh ta duak a. ‘Eh’ pawh ka ti hmah eih lo. “Mate, ni a sa...” tih thâwmin a rawn chhunzawm a, tute thâwm nge tih chu hai rual a ni lo.

Tûk dangah pawh ni chu a sa fo si a, tia ka ngaihtuah neuh neuh lai chuan thlang lam tukverhah Chhura buh en tumin ka dâk chhuak mai mai a. Kawmthlang te nu-fa chuan sikul thawmhnaw hi an lo pho mêk a. A la ro chiah lo tih chu râl atang pawhin a zuk hriat theih mai.

Sikul tan nân dârkâr khat bâk a awm tawh si lo. An tân ni sa hlut turzia kha ka lo ngaihtuah ngai rêng rêng lo. Keini chu washing machine hmangin kan insu a, kan spin a, dryer hmangin kan tiro leh a, ni sa kan mamawhna hi a lo tlêm ta hle mai.

 

Kan thing tuah tur chu gas a ni a, kan tuikhur chu kan chokaah kan herh haw ta teu teu mai. Refrigerator chhûngah thlai leh thei chi tinreng kan rahtîr a, khaw lum leh vawh thu-ah khaw awmdan aiin kan duhdânin kan set zung zung ta mai. Kan ke chu lirthei a ni a, kan lehkhathawn chu phone a lo ni ta. Kan êng chu electric current a ni a, kan thim chu battery low a lo ni ta si.

Khuarêl thatna zâr kan zo lai khân engkim hi a dân ang thlapin a kal a. Zîng leh zân a awm a, mut hun leh thawh hun a awm a, ei hun leh thawh hun pawh a awm. Tunah erawh hun hian ‘bi’ a nei tawh lo a, ram hian ‘ri’ pawh a nei thei tawh hek lo. Nun hian ‘phung’ a nei tawh lo a, purun takngial pawhin ‘zung’ a nei hman tawh lo. Ngaihzawng pawh ‘di’ kan ti ngai tawh lo a, ngei zawng lah kan ti ‘ti’ thiam êm êm zui.

Thinrim deuha “U Awmte” tia min ko ri ka hria a, ka harh chhuah meuh chuan ka fanu naupang zâwk chuan ka ke-ah min lo kuah reng chu niin. Ka zuk kûn hniam a, a mittui lah a lo parawl kuang lehnghâl. Ka va han lainat tak êm! Kei, a pa hian suangtuahna khawvêlah ka chênsan a, ka lo ngaihsak hman si lo. Choka lam ka hawi phei a, gas alh pâwl phêt phêt chungah chaw a lo inchhuang a, kan nu lah chuan purun zung a lo chan mawlh mawlh a, mi pawh en tha duh mang lo chuan thinrim deuhin min rawn melh leh zawk zawk thin a. Tap-a a tui herh hawah chuan antam a lo chiah lung a, dawhkâna a phone dah chu zawi tê têin a zaitir a. Khua a vawh deuh avangin AC lah chu a ON kher lehnghâl.

 

“A pa...” ti chunga ka ke a rawn pawh leh det det tâkah chuan ka fanu lam chu ka zuk hawi a. “Ni a sa,” a tih meuh chuan electric current êng nuam tak leh lum nuam tak hnuaiah awm mah ila, ka fanu chuan Pathian malsawmna ni êng lawm a châk tih ka hria a, inthiam lo tak chungin ka pawm kâng nawlh a, pâwnah chuan ka chhuahpui ta a. Kawmthlang te nu-fa kha ka zuk mitsîr hrâm a, hmeichhe naupang chuan a kawr hâk tur chu a lo sam kual dan dan a, thing pharh pharh chung chuan inah a keng lût ta a.

Read more »

Bethesda dîl kamah

Bethesda dîl hi Jerusalem-a awm a ni a. A hming awmzia chu ‘Zahngaihna in’ (house of mercy) tihna a ni. Bethesda dîl hi ‘beram kawngkhâr’ kianga awm a ni a, historian Eusebius (A.D. 330) chuan ‘berâm dîl’ (the sheep-pool) tiin a ziak.

Bethesda dîl hian hulhliap panga a nei a, (Johana 5:2) chutah chuan dam lo tam tak an mu a. Damna beiseiin ni an vui liam thin. Bethesda dîl hi vantirhkohin a rawn tiphûl thin a, chutia a phûl laia dîla inchiah hmasa ber chu eng natna vei pawh ni se an dam viah thin.

He dîl kiangah hian mi pakhat; vanduai êm êm mai leh khawngaihthlâk tak, kum 38 lai dam lo chu a mu ve a; mahse, dîl a phûl changin midangin an luh khalh leh thin. Chuti chung chuang kum tam tak chhûng chu beidawng loin a lo nghâk ngat ngat tawh a ni.

Isuan a hmuhin “Tihdam i duh em?” a ti a. He dam lo hian dam a duh ang tih chu kan hre theuh awm e. Mahse, Isuan a zawt kher a. Hei hian kan duhthlanna pawimawhzia a tilang chiang hle. He dam lo hian ‘Duh e’ tia chhâng ta mai lo chuan tui fâwn chânga midangin an pên thlâk khalh thu-in a chhâng a. ‘Ka duh e’ ti lo mah se, Isuan a duhna kha a hriatpui êm êm a ni. Chutichuan, kum tam tak beiseina nêna a lo nghah tawh ang ngeiin a awngphah a la a, ke-in a kal ta a.

Natna veiin kum tam tak i lo inenkawl tawh a ni thei. Harsatna leh mangannain a tlâkbuak che a, hun rei tak chhûng beidawngin i kun tawh pawh a ni thei e. Bethesda dîl kama dam lo pawhin kum 38 lai damna beiseiin a nghâk a, a tâwpah Isuan damna a pe ta. Doctor chi hrang hrang rawnin damna i la chang lo a nih pawhin beidawng suh; Isua a awm e.

Rilru hrehawm takin i damchhûng hun i hmang mai dâwn em ni? I buaina kha Isuan a hria a, i manganna kha a hriatpui che. Isuan “Tihdam i duh em?” tiin min zâwt a. Kan duhthlanna chiang taka kan hrilh erawh a tûl thung. Taksa damna mai bâkah rilru leh thlarau damna neitu chu Isua a ni. Bethesda dîl kama kan mu hi min chhûn pelh mai dawn lo. Min rawn pan a, min rawn en a, damna min pêk ngei a tiam. A hnenah chuan kan harsatna leh manganna te hrilh ila, kan buaina zawng zawng pawh i thlen ang u. Min tanpui a intiam si a.

A hnu deuhah Isuan chu dam lo chu biak inah a hmu leh a. Helai thu hi ringtute tan a pawimawh hle. Isuan min tihdam hian keimahni duhna lama kal mai loin kohhran kan bêl tlat tur a ni a. Biak inah Pathian chibai bûkin kan kal thin tur a ni.

Read more »

Misual leh mi tling lote thlangtu Pathian

 

 

A tira Pathianin lei leh vân a siam lai khân thing leh mau, ramsa leh chunglêng sava zawng zawng te kha famkimin a siam a. Ama anpuia Adama a siam kha mihring hmasa ber leh famkim awmchhun a ni. A kawppui Evi pawh kha Pathian hmuhin famkim tho a ni.

Suala tlûkna a lo awm khân mihring chu Pathian laka mi hrang niin kan felna leh tlinna, thatna leh famkimna chu tihchhiata awmin mi tling lo leh bawlhhlawh kan lo ni ta.

Sual sualna hi hria ni ila tu nge sual duh ang? Thatna thatzia pawh hria ni ila, tu nge hnung chhawn phal ang? A ni tak e, finna rilzia leh dawhtheihna ropuizia hi zir fo kan ngai; pass chhuak erawh tlêm te an ni si.

Pathian hian hre reng chunga tisual leh hre loa tisualte pawh ang khat renga a hrem si chuan sima ngaihdam dîltu chu ang khat rengin a ngaidam bawk thin. Kristian tha ni tur chuan famkimna nun nei tura ni tin hmalam pan zêl a ngai. Famkim lohna khawvela famkim tum chu hah chauh kan hlawh ang tih erawh a hlauhawm hle. Mahse, famkim dawn lo tih inhre reng chunga famkimna nun neih tuma bei talh talhtuten fak an hlawh thin. 

 

Kan hloh hi hlêpa chhiar nachang kan hriat loh chuan engkim mai hi hahthlâk leh ninawm a chang mai thin. Mi tha, mi tling, mi tlâk, mi famkim te chauh hi Pathianin thlang dawn ta se, kei zawng mai an pâra ka awm hma hauh pawh khân ka tla sa asin.

 

“Sual nei lo chuan deng rawh se” tih ang khân mi tling te chauh hian Pathian rawng bâwl dâwn ta se, uire nu ang mai khân kan kiansan mai lo’ng maw? Pathian thatna leh ngilneihna hmu chiangtuten fak an ning lo fo mai hi an demawm hran lo e; an hmu chiang êm a ni.

Pathian mi hman te hi ‘tling’ leh ‘tha’ nia inhria an awm ngai lo ang bawkin tling lo leh fel lo, tha lo leh lâktlâk loh tak tak te an ni fo mai hian khawvel mit a tikham fo. A ropuina leh sânna zawnga teh dawn chuan Pathian mite hi zahpuiawm an ni châwk.

 

An ropuina leh mawina chu Pathian a nih miau avangin khawvel mite lakah tlâwm hle mah se, Pathian lakah chuan an hlu-in an mawi a ni. Khawvel thila ropui te hi Pathianin a hnâwl a ni ngawt lo a, thinlung lama mi tlâwm te hian hnehna an chang fo thin. ‘Lalpa ka lâwm e’ tih nachang kan hriat hian Lalpa chuan “Ka beramte châwm rawh” tiin min sâwm thin a lo ni.

Read more »

Isua leh Nikodema

 

Kalhlen Kût hmangin Isua chu Jerusalem-ah a awm a. Thilmak tam tak a ti a, mipuiten amah ringin an zui nasa hle. Zanah a zirtirte nên an awmho laiin Juda-te hotu pakhat (ruler of the Jews) Nikodema a lo kal a. An sawi dânah phei chuan roreltu pawimawh tak a ni awm e.

Nikodema hian Isua a ring hle a, “Pathian hnên ata zirtirtua lo kal i ni tih kan hria; Pathian an chunga a awm loh chuan heng thilmak i tih ang hi tuman an ti thei lo ang,” tiin a sawi hial a ni. Nikodema hian Isua hi Pathian fapa/tirh a ni tih a ringhlel hauh lo.

Amaherawhchu, Isuan “Tu pawh an pianthar loh chuan Pathian ram an lût thei lo ang,” tiin a lo chhâng a. Isua chhânna hi Nikodema tân chuan hriatthiam a har hle ang. Ani, Juda hotu, Temple-ah te lo zirtir a, ro lo rêl tawh thin; mi fel tak, mite fak hlawh leh entawn tlâk tan chuan a hrilhhai thlâk hle ang. Chu mai pawh ni loin mi tam takin Isua an rin loh laiin ani chuan a ring thlap bawk.

 

“Pathian chu pakhat a ni tih i ring a ni maw? I ti tha e; ramhuaite pawhin an ring a, an khûr thin asin,” (Jakoba 2:19) tih ziak kan hmuh angin mi hian Pathian hi an ring a, an ringhlel hauh lo. Amaherawhchu, heta rinna chauh hian chhandamna a thlen chuang si lo.

Nikodema nun atanga kan zir tur pawimawh tak chu Isua hi kan rin ringawt hian chhandam kan ni lo a, thlaraua piantharna kan chan a ngai. Nikodema’n Isua a ring a, ramhuaite pawhin Pathian an ring a; mahse, chhandam an ni chuang si lo.

 

Kristian chhungkua atangin kan seilian a, kan Kristianna hi pian ken a nih miau avangin piangthar emaw intih mai awl tak a ni. Naupan têt atangin Pathian thu kan inzirtir a, Isua chanchin kan hre bel hle thin. Amaherawhchu, heta hriatna chauh hian vanram min hruai thleng dâwn si lo.

Misual bera kan ngaih te pawh hi zâwt ila, Isua ring lo fa an awm hauh lo ang. A rin hi chu kan ring a; mahse, a taka chan tur a ni thung si. Isua hi Pathian fapa a ni tih ringhlel hauh loa kan nun kan hman ngawt hian Pathian lâwmna a thlen lo. Rinna chu thiltih tel lo chuan thi a nih ang ngeiin kan rinna chu piantharna chan nân kan hmang tur a ni.

Read more »