“A ram leh a Felna” chu eng nge?

A hmasain Pathian thu dikna leh dik lohna lam kan sawi lova, A rinawmna leh rinawm lohna lam kan sawi dâwn bawk hek lo. He ta “A ram leh A felna” kan tih fo hi engnge ni a, eng tin nge zawn tur? Chumi hnuah “chûng zawng zawng chu a pêk belh chhah dâwn che u nia” a tih hi engnge ni ang? tih te hian ka rilru a tibuai fo a, ka auchhuahpui ta nge nge a ni.

Têtte aṭangin Kohhranah inhmangin a kûl a tâiah ka ṭang ve ṭhin. Kohhrana ka inhman hian ka nun a hlim a, lâwmna pawh tam tak ka chhar a, ka taksa leh thlarau tân hahchawlhna leh chaw ṭha tam tak ka hmu bawk. Tûn thleng pawhin ka la inhmang a, ṭhalaiah OB ka ni a, Bial Zaipawl Conductor ka ni mêk bawk. Chuti chung chuan MA ka zir a, 1^st class-ah pass-in top 3-ah ka lang ve nghe nghe. Hêng zawng zawng hi ka thawhrah ni lovin Lalpa malsawmna ka dâwn a ni. Ani chuan taimâkna leh hriselna min pe a, ka dil loh malsawmna tam takin min vûr ṭhin. Ka tum ber chu Pathian rawngbâwla Kohhrana inhmang chung hian kan zirna leh hnathawhnaah ṭha takin kan ti thei a ni tih lantir hi a ni a, ka hlawhtling ve viau chuan ka hria. Lawmthu sawina tûr hlîr a lo ni.

Hun a lo kal a, hna zawn a lo ṭûl a, exam neuh neuh hmachhawn tûr a lo awm ta! Hetih hunah tak hian eng chu nge a ram leh a felna ka zawn hmasak tûr chu tihah hian ka buai fo ṭhin. Nikum kum tâwp lam khân kan Kohhranin mission field kan tlawh dâwn a, kal tûrin ka inpe ve a, mahse ka hna dil pakhat chu written-a ka tling ve a nih chuan kan zin hlâna interview a ṭûl dâwn si a. Ka ṭhulh leh ta a. Written-ah chuan ka tling a, interview-ah ka tling leh ta si lo. Mission field tlawhho an rawn hâwn chuan “A ram leh a felna i zawng hmasa lova, i hlawhtling lo a nih kha” min ti ta!

Tûn hnaiah pawh exam tûr neuh neuh ka nei a, lehkha zir ngai bawk, Kohhran leh thalai, Bial zaipawl programme khat tlat bawk si, ka buai ṭhin kher mai. Hnatlâng emaw, Kohhran zaipawl hlazir emaw han kal lo hlek ila ṭhenkhatin “A ram leh a felna hi zawn hmasak tûr a nia” min ti ve chhên bawk nên. Nun hi a chêp ru tlat! An thlîrna tlâng aṭang chuan a âwm hliah hliah. Bial zaipawl conductor ka nihnaah Kohhran zaipawl hlazir chu tel ngei ngei tûra ngaih ka ni. Ṭhalai OB ka nihnaah ṭhalai thiltihnaah tel ngei ngei tûra ngaih ka ni bawk. Ka nun khaw chhuah nân ka beih a ngai a. Ka ei leh in, silh leh fên leh inchhûngkhur mamawh ka thawh chhuah a ṭûl bawk si. Tunhma kha chuan ka moderate thei viau, mahse tûnah chuan a har ka ti ve ta. Nu leh pa châwm hlâwm nih reng hi ka duh lova, theih tâwkah mahni mamawh na na na chu thawh chhuah ve ka duh a, ni tin private-ah ka inhlawh a. Chu a chhapah Mizo dânin ka nu leh pa te hi ka châwm tûr an la ni zui. Nun hi fight tak zet zet a ṭûl a ni.

Eng tarmit nge ka vuah tâk ang aw... Kohhran mite chuan hetia ka inkhung a, Kohhran thiltiha ka tel tlêm hian min hmu he mai zuk nia. Mi ṭhenkhat erawh chuan kan nunna atâna nasa taka kan beih hian thil dik tiah min ngai ve bawk. Helai inkar tak hi siam rem harsa ka va ti êm!

Mathaia 6:25-34 thu hian nasa takin min daikhalh ve bawk si a:

“Chuvangin, ka hrilh a che u, ‘Engnge ka ei ang a, engnge ka in ang aw?’ tiin in nunna thu leh, ‘Engnge ka silhin ka fên ang aw?’ tiin in taksa thu lungkham suh u. Ei tûr aiin nunna a thupui zâwk lo vem ni? Silhfen aiin taksa pawh a thupui zawk lo vem ni?

“Chunglêng savate hi en rawh u; buh an tuh lo va, an ât hek lo, buh inah an seng lût hek lo; nimahsela in Pa vana mi chuan a châwm si a. Nangni chu anni ai chuan nasa takin in hlu zâwk lo vem ni?

“Tin, nangni zîngah lungkham avangin tuinnge mahni dung lam tawng khata tisâng chuang thei? Tin, silhfen thu engahnge in lungkham ni? Ram tûktinpâr ṭhanzia hi ṭha takin ngaihtuah rawh u; hna an thawk lo, la pawh an kai hek lo; Nimahsela ka hrilh a che u, Solomona meuh pawh a ropuina zawng zawnga a inthuam khân, hêng tûktinpâr pakhat tluk pawh hian cheiin a awm lo. Chutichuan, ram hnim, vawiin anga nung, atûka thuka tuah leh mai tûr mah Pathianin chuti kauva a chei chuan, aw nangni rin tlêmte u, silhfen a pe zâwk êm êm dâwn lo che u em ni?

“Chutichuan, ‘Engnge kan ei ang?’ emaw, ‘Engnge kan in ang?’ emaw, ‘Eng sinin nge kan awm ang?’ emaw tih, lungkham suh u, Jentailten chûng zawng zawng chu an zawng ṭhin a ni. Chûng zawng zawng chu in mamawh tih in Pa vana mi’n a hre reng a ni.

“A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u nia. Chutichuan, a tûk atân lungkham suh u, a tûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni.”

Thil ṭha pahnih thlan tûr a awm hian thutlûkna siam a har ṭhin an lo tia, a dik hle. Rawngbâwlna ka thlîr chuan a thim a var pawh thlu lova thawk bawrh bawrh tûr ka nih laiin, ka hmalam hun ka thlîr erawh chuan ka beih ve hi chu a ṭûl a ni tih ka hre bawk si. Eng pawh chu ni se, "A ram leh a felna" tih Bible-a kan hmuh hi he lei kohhrana inhman hi a ni tihna nge ni a, kan zirlai, eizawnna leh kan ni tin hnathawhnaa rinawm taka thawh mai hi?

Posted in: Pathian Thu