Ringtu Smart

Pathianin mihring a siam khân saruak vekin an awm a, an zak lêm lo (Gen. 2:25). Hei hi a chhan chu chhia leh tha hriatna an la neih loh vang a ni. Mihringin a duhthlannaa a chhia leh tha hriatna thing rah a ei hnu khân saruak an nih an inhria a (Gen. 3:7). An zak a, theipui hnahin pawnfen an insiam chawp ta a.

Mihring nihna dik tak chu saruak a ni a, kan mawina dik tak pawh saruak a ni. Kan pian tirhin saruak kan ni a, kan zak ngai lêm lo. Eden huan bawhchhiatna avangin saruak kan nih kan inhria a, kan lo zak ta thin.

Mawi leh nalh kan duh a, rualpâwl loh kan hlauh luatah a châng chuan kan ti lutuk fo thin. Mite aia mawi bîk leh nei tha bîk nih kan tum châng a awm ta fo mai. Bawhchhiatna suala kan tlûka a chhia leh tha hriatna kan neih pawh tih tawh nâk-a-laia mite aia uchuak taka inchei kan la tum thin hi chu Eden huan bawhchhiat nawnna ang mai a ni.

Amaherawhchu, Pathianin mihring a hmangaih êm avangin theipui hnah pawnfên ngawt chu duhtâwk loin savun kawrfual a siamsak ta a (Gen. 3:21). Mihring chu ama mihringpui mitah mawiin a lo lang ta a, Pathian mitah erawh kawrfual chuan an bawhchhiatna sual a târlang thung.

Ringtu kan nih chuan mawihnai taka inchei te, thianghlim taka inthuam te hi kan tihtur pawimawh tak a ni. Thenkhatin, “Incheina ringawt kan buaipui a, keimahni leh Pathian inkar hi a pawimawh zâwk. Kekawrbul leh t-shirt nên mai mai pawh inkhawm ila a pawi lo, ram dangah pawh an tihdan a ni ve tho,” tiin an sawi fo. Ni e, keimahni leh Pathian inkar hi a fel hmasa tur a ni. Kan inkar a fel phawt chuan, thianghlim leh mawi tinreng duh mi, a tha ber ber duh thin Pathian hian Amah chibai kan bûk hian thawmhnaw mawi leh tha ber pawh a duh ngei ang tih hria ila. Kan theih tawka mawi leh tha ber inbel thin ang u.

Thawmhnaw man to leh tha ber ber lei i tum ang u tihna lam ni loin, kan theih tâwka tha ber zel hi Pathian tân i hlan ang u tihna zâwk a ni. Eng emaw remchan lohna avanga thawmhnaw inthlâk hman loh chu a awm thei. Kan rilrua kan dam tlânna a pawimawh ber rualin Pathian laka kan landân hi kan uluk a ngai fo. Chhûngril lam mai ni loin pâwnlam pawh uluk ang u. Thianghlimna Pathian ropuizia hi hre nawn fo ila a tha hle awm e.

Pathian hi a ropui a, amah chibai bûka kan kal hian felfai leh zahawm, thianghlim leh mawi takin inthuam thin ang u. Ringtu tihawm rênga mawiin inthuam ila, thatchhiat avanga ringtu tawp tak nih ai chuan Ringtu Smart nih i thlang zêl zâwk ang u.

Posted in: Pathian Thu