Mei alh leh chhûm ding

 

 

Israel fate Aigupta salah kum 400 zet an tân hnu-in Pathianin Mosia hmangin a hruai chhuak a. Kum tam tak tihduhdahna hnuaia awm an nih avangin an rilru pawh a phuailuai tawh hle-in a rinawm. Mahni indah hniamin rilru thlaphang leh hlau rêng rêngin an awm ngei ang. Aigupta ram atanga hruai chhuah an nih khân an taksa chu zalên mah se, an rilru saltu a awm tlat avangin an harsatna sutkian chu thil khirh tak a ni ngei ang le.

 

Cairo atanga Jerusalem hi 427 km-a thui a ni. Kawng tawi lamah kal ta ila, ni 40 chhûng lekin Kanaan ram a thlen theih ang. Mahse, Pathianin kawng kual lamah a hruai a, kum 40 lai an thang ta.

Awlsam taka thleng thei an nih laiin Pathian chakna chauh rin theihna hmunah an awm a. Kawng bumboh leh harsa takah Pathian kut chak tak hruainain an kal ta a ni. Zânah mei alhin a hruai a, chhûnah chhûm dingin a hruai thung.

Pathian hnathawhna hmun pawimawh tak chu hriat loh ram kan dai hian a ni. Kan rilru leh ngaihtuahna siam that ngai a hriat tlat avangin kawng kual zâwk leh harsa zâwkah min hruai fo. Amah kan rin theih nan leh kan hriat chian nân kum tam tak min vahvaihpui thin.

 

Israel fate kha an sual a ni ngawt loa an rilru kha tunlai tawng takin a depress nasa êm êm a, stress an nei nasa hle-in a rinawm. Hlauhnain an khat a, an chi-ai hma êm êm bawk. An mumangah Aigupta sipai hruihrual an mang a, thisen leh hliam tuar hmêl an hmu fo ang. Aigupta ram atanga taksa kal chhuak ni ngawt loin an harsatna hmun ata Pathianin a hruai chhuak a ni.

Tunlaiah mi tam takin harsatna leh manganna rit phurin kan rilru a chi-ai nasa thin hle. Depression hial neiin kan rawngbawlna pawhin a tawrh phah hle thin. Pathian hian kan taksa leh thlarau mai ni loin kan rilru ngaihtuahna thleng hian min chhanchhuah a tum a ni. Chuvang chuan kawng awlsam leh hnai thlang mai loin harsatna tam tak min pal tlangpui a, tuipuisen min kânpui a, thlaler ram ro min daitir thin.

Hêng harsatna karah hian mahni chauha kal emaw kan inti a, kan chunga mei alh leh chhûm ding kan hmuh hmaih fo. Pathian hian min thlahthlam lo a, min kalsan ngai hek lo. Ramtiamah thlamuang tak leh nghet taka kan khawsak a, hlauhna leh rinnghelhna zawng zawng kan paihthlâk a, Pathian chauh kan rin theih nân kan mihring hlui chu kawng lakah tihboral vek a duh a. Mihring thar nen ramtiam min thlenpui a tum a ni.

Posted in: Pathian Thu