Nun thubuai

Hringnun rahbi tin hi chhiar kim dap theiin, a hlutna zawng zawng pawh chhût chhuak vek thei ni ila, mi famkim kan lo ni ang. Thinlunga zawhna awm zawng zawng hi chhâng kim vek thei ila, mihring ka ni dâwn si lo. Nunah harsatna a lo awmin zawhna a lo chhuak a, hlimna a lo thlenin chu zawhna chu chhânin a awm emaw kan ti thin. Mi tin hian kan pian ni atanga kan thih ni thlengin nun thubuai kan awrh reng a. Sawipuitu ukil mamawh hle mah ila, khawi lam mithiam ber pawhin kan buaina thurûk chu min chin felsak thei si lo. He hringnun court-ah hian ni tin kan inkhing a, hnehna kan chang emaw kan tih laiin kan tlâwm a, kan hriat loh kârin hnehna kan chang leh si thin.

Zawhna chhân sên loh mahni kan inzâwt a, a chhânna kan zawng bawk a, nimahsela, kan hmu kim thei si lo. Tu pawh mai hian tum kan nei theuh thin, kan tum panna kawng chu eng anga harsa leh hrehawm pawh ni se paltlang tûrin chakna kan insiam thin. Kan tum kan han thleng a, hlawhtling tiin tu fa mah hi an thu thluang chuang hauh si lo. Mi tin nunah hian thu buai, chin fel tûr hi ni tin bâng lovin a awm zêl dâwn a nih hmêl. Nuna zawhna a lo awm a, ka chhân thiam si loh hian a châng chuan ka nun min vaw chau a, ‘eng ti tûra lo piang nge ka nih?’ tih zawhna hi ka inzâwt nawn leh thin.

Mihring nun hi a lo ho mang e. Thihna te hian eng tik lai pawha kan nuna lal ber ni tûrin min hual reng si a. Mut hmunah te hian ka inngaihtuah neuh neuh a, hringnun hi ka hrethiam thei lo, mahse ka nunpui ang lawi bawk si. Nun thubuai kan neih reng avangin mi tinin hahchawlhna kan zawng a, rin tûr kan mamawh a, thawh tûr kan duh thin. He nun thubuai avang hian alâwm a thenin ‘mihring hi pathian kan ni’ an tih a, ‘hnam hi kan sakhua a ni’ an tih a, a thenin sum leh pai an ûm huam huam a, a thenin tual an thah a, a thenin mahni nunna pawh zah zo lova an chhah a, a thenin midangte an tihbuai thin.

Nun thubuai nei lo fa kan awm si lo. Chu thubuai chhânna chu kan zawng theuh a, kan zawn dân erawh a inang si lo. Thiante bula kan awm lai te, office kan kai lai te, kan inkhawm lai te, kan inkhelh lai te leh kan mut lai te hian eng emaw min mawlhtu a awm thin. Khawvêl hi nuam kan tih êm êm châng a awm a, a châng leh kan ning hluah hluah thin. Chu chu nun thubuai chu a ni. A chinfelna erawh ka hrilh thei hauh lo che. Kei ngei pawhin ka nei a, ka rawn sawi chhuak ve mai a ni.

Posted in: Hringnun