HMANGAIHTU NGÂWI CHÀWI

Thu tha leh ril pui pui, ngaihnawm tak chhâk chhuak tûr khawpin ka thiamnain a phâk lova, thu duli tê tê, thinlunga khat liam chu ka rawn mualphopui ve rêng rêng teh ang tiin; mahse ngai teh, ka la zâm ta fo mai! Zak mah ila, eng vang kherin nge maw ka zâm reng bîk ang le tiin he lamtual zau laiah hian ka rawn tulpui ve ta nghawng nghawng mai a nih hi, tu’n min sêl bîk lo’ng chu maw...

Khawvêl mawina pár ka tlàn a, a zu thlum tak ka dàwn lai chuan ngai teh, he thu hi ka hnênah a lo thleng a, ka ti mai dâwn lo, a takin ka tawng zâwk a ni. ‘Mipa takin i puan veng la’ tihte hi ka Bible châng duh ber a ni thin, mahse a hmaah chuan naupang ang maiin ka zak a, ka khùr ru thin nia maw le. Ka pa zo thlâwt lo! Mai mai saala!

Silent is Gold: Zîng vartianah ‘Good Morning’ tih message a rawn thawn a, zànah hma takin ‘Good Night’ tih a rawn thawn leh a, a bâk zawng chu thehmeh takin zuk reh vang vang zêla maw le. Message thawn lahin a rùl mawi tâwk, thinrim theih si lohin min chhâng thiam a, han call lah hian lungawina khawp chu min pe thiam ang lawi bawk si. Biang insi riala kan inkuah vawng vawngte hian beng bulah zawi sapin ‘Ka hmangaih che’ min ti ve dâwn emaw ka tia, ka nghah vang vang pawhin zuk ngawi tlat zêl a. Beisei nei takin nghâk thin mah ila, râla thing hnah thliin a chhêm rik heuh heuh bâk hriat tûr a awm lo va, nghah chhuah tûr a vâng thin teh e.

Thu tam sawi ngai lêm lo mah se, ka kam chhuak hmangaihna ai chuan a chêtzia hmangaihna chu a thûk zâwk tih ka hai lova, duh taka kan inkuah vawng vawng laite chuan a kuta nghet taka min kuahna leh a âwma min pawmchilh a, a lungphu rang taka phu det dette chuan thu tam tak min hrilh zâwk a ni. “Ka hmangaih che” tih tawngkam chu a kâa chhuak atân zawng a sit a ni ngei ang. Kei ve lah hian ka chhâk chhuak mawlh mawlh a, mahse ka ûm phâk leh ngai si lo. A ni zawngin a sawi ve mai mai ngai lova, a nunah erawh chiang taka inziakin hmuh hmaih tûr khawpa fiah lo a ni hek lo.

Ka vânnei ber: Kam tam lo, mahse ril si; thil ti puat puat lo, mahse a hun taka ti thin; beisei san viau chi loh, mahse nghet êm êm si; rinhlelh tûr zawng zawng mah ila, a rinawmna bâk hmuh chhuah tùr ka hre thin lo. Kei zâwk hian ka phar-varsan a, ka hir-hasan thin. Ani erawh chuan rinawm takin min lo la nghâk fan fan thin nia maw le! Hmangaihna dik tak chu amahah ka hmu a, rinawmna chu office bangah mai ni lovin a thinlung chhûngrilah chuan a inziak si. Khawvêl hian mi vannei min ti mawlh rawh se! Hmangaihtu ngâwi chàwi tak zawng, ka hahpui viau dâwn emaw ka tia, chhûngrila hmangaihna tak ka hmuh meuh chuan ka hahchâwl êm êm a lo ni zâwk reng si a!

Posted in: Hmangaihna