CHHÂN LOH HMANGAIHNA

(Ka ṭhian tu emaw tân)

Ṭhangkhat leh a chanve len zet chu he hringnun rahbi bumboh leh kikawi zet mai hi ka lo zawh ve tawh a. Hmangaihna awmzia pawh hi hrethiam lo tûr khawp chuan ka â tawh lo asin le. Mahse mihring ṭawngin 'Hmangaihna' a tih hi eng nge a nih a, eng nge a hrilhfiahna? tih pawh hi kei, vaihlenhlo ṭhenawm mai, mi ṭhatna a zâra mi chaw bâr ruala bâr ve ṭâwk ṭâwk tân hi chuan hriatthiam zawh rual a la ni ta chuang lo.

Tlangvâl ve nafam chuan hmelṭha tih zâwngte chu kan hmu vein nula tam tak chu ka uipui tuilian thlîr liam ve nual tâk kha! Ka vei ut ut te hi ka hmangaih berte an lo ni lo. Mumanga ka hmuh zin ve êm êm te hi ka ngaihtuah nasat ber berte an ni lo. Chaw ka ei tui loh chhan pawh ka hmangaih êm vâng a lo ni lo leh a. Ka dream vak vak pawh ṭha ka tih vâng mai te a lo ni a, duhthu ka sâm vak vakna pawh duhna avâng maia lo awm a ni ṭhin. Hmangaih hi chu a dang daih, chu chu a ni mai. Tawng ve la, i hrethiam ve mai ang. Chumi hunah chuan ka chan hi min hriatthiampui ve-in ka tuar natzia hi chek tlawk tlawkin i la ṭahpui ve mah na.

Hmangaihna chuan hmangaihna bawk a ṭah ngen ngawih ngawih mai ṭhin. A chhânna erawh mi zawng zawng tân a siam a ni si lo. Ka dawn chhun chu 'ṭhian atân' tih a ni leh mai ṭhin si a. Pathian remruat dân hi hriatthiam har ka va ti ṭhin tak êm! Chhân loh hmangaihna chuan malsawmna ṭhian ṭha-in min vûr hlauh zâwk a. Ka dîl loh zâwk malsâwmna dawng tûrin ka lu chungah kut nghatin mal min sâwm a. Ka tân chuan malsawmna anchhia a tling a, ṭap tûrin ka nui lek fang a lo ni. Chu hmangaihna chuan ka tân pâr a chhuang ve mawlh si lo. Mi vanduaite zîngah chuan a tlar hma berah ziah lan ka ni ngei ang le.

Kei, lunglênna fahrin, khawharna chhûl chhuak hian he lei nun khawhar hi mahriaktein ka tuar chhuak zo mawlh lo vang. Ka damna tûrin damna dawi 'hmangaihna' chu khawiah nge? Gilead-ah thinghnai damdawi a awm lo'm ni? Tahchuan tidamtu chu a awm na nge? Hmangaihna zûna uaiin ka chau zo ta, he lei thiamna damdawi hian ka tân kori a tu lo va, doctor thiam ber pawh rawn hruai mah ula, beidawng chal dawmin a kîr leh ngei ang. Mi pakhat, amah chauh chuan damna famkim min pe thei a. Mahse chu damna sakhmêl mawi chu a to lutuk a, ka lei zo mawlh si lo.

Bawihpui, min lo hmangaih ve lo a nih pawhin ka hmangaihzia che hi chu min lo rinsak ve hrâm ang che aw. I tân chuan ṭhian ka ni a, mahse ka tân chuan i ni ve si lo. Ka tel lo hian i hlim thei a nih pawhin kei zawng, i tel lo hian ka hlim lul lo asin. Ka hmangaih tluk zet che hian ka mamawhna che pawh hi a sâng a ni. Nangin min hruai loh chuan he hmangaihna hringnun lamtluang hi ka zawh zuam lul lo.

Mûrvate thlâwkin lêng la, ka hmangaih chu biahthu di va hlân nâng che. Ka beiseina ka lo tihsân viau lai hian ka lo tisual zâwk em ni? Ka tisual a nih pawhin min dem mai lo la, ka hmangaih che hi chu a thiang ve tho a ni lo'm ni? Min hmangaih ve lo tûra ruat i ni bîk erawh hi chu chung Pathian khi a themthiam leh lulai hret zawng a ni e. Ka ngai êm êm a, mahse ngaih ka hlawh ve si lo. Atân ka engkim ka phal a, ka ngai pawimawh a, a hlim loh ka hlau a, a nawm loh ka duhsak lo va, atân thih hial pawh ka duh ta ve ang. Mahse ka biakna ṭawngkam chu mark khat pu miin min chhâng a, descriptive chu short-in min chhâng si.

A nuihna tûrin fiamthu-bu ka chhiar tlauh tlauh a, a mangana thlamuan thei tûrin Bible pawh ka bih âwl nahek lo. Chuti chung chuan a chhânna chu 'ka ṭhian' tih mai hi a thunawn atân min thum rawn khum tlut tlut mai a ni. Aw, chûng zawng zawng chu chhân loh hmangaihnain a rah chhuah malsawmna chu a ni si a. A tuartu tân a va na tak êm! He leia ka damchhûng zawng chuan ka ṭahna khua hi hrui angin a sei zêl dâwn a nih hi. Mahse chu hmangaihna chu ka ṭah avângin a lo thleng thei si lo va. Ka vei avângin ka vei chhuak zo bawk hek lo.

Ṭahna ruam pawh zawh mah ila, midang avânga ṭah ai chuan nangmah avânga ṭah pawh hi a nuam a. Nangmah avânga ka ṭap thei hrim hrim pawh hi ka va lâwm tak êm! Pialral thleng pawhin ṭap dâwn mah ila, a man tho tho ka ti. Chhân loh hmangaihna natzia hrethiam ve tûra Pathianin min siam pawh hi ka lo vannei ve rêng rêng e. Lungngaihna chu hlimpui ka tum a, mahse ka ṭahna bianga mittui luang chu ka ko kir thei si lo. In vawnna tûr ka zawng ruai a, beidawng takin bahzarah ka uai hnâwp a - 'Naupang chhia mai ka ni tawh lo va, chhân loh hmangaihna chu ka ṭahpui reng bîk lo'ng e' tiin ka biangah chuan mittui a rawn far keuh keuh a.

Posted in: Hmangaihna