DUHTHUSAM

Khawvêl mihring, tungchhova kal zawng zawngte hian duhthusâm kan nei vek a, chu duhthusâm chu tihhlawhtlin ngei kan duh bawk thin. Kan duhthusâm chu a tê emaw a lian emaw; a tha emaw, tha lo emaw pawh ni se, duhthusâm a nih phawt chuan a aia thlanawm zâwk a awm thei chuang lo.

Ka duhthusâm chu thil lian leh ropui tak a ni lêm lo, ‘hmangaihna’ bawk a ni (kual kual ve thin mah ila, a bu kan lêt hi chuan hmangaihnaah bawk kan inchhuih tlu leh thin!). Khawvêl ropuina zawng zawng neih a, engkim neih theih hi ka thlang ber lo. NANG hi ka thlang che a, ka duhthusâm chu i ni. Ka theihna tlêm hle mah se i duhzâwng tihhlawhtlin a, i lâwmna tûra phei khai vawr hi ka châk reng thin, chutichuan nang hi ka lamah lo hnaiin ka tân i pâr ve thei mah na! Chu te mai chu ka duhthusâm chu a ni (holam leh si ve!).

Chu duhthusâm tihhlawhtlin nân chuan ka theih tâwp ka chhuah a. I lungngaihna hnêm tûrin ka bân ka phar a, mahse ka ban phâk lohah i tawlh sawn zêl si. I mangana thlamuan tûrin Bible ka bih âwl lo va, mahse Bible châng ka by-heart te chu thil tih nei lovin boruakah a thâm ral leh si thin. I hlim loha tihlim tûr chein thawnthu bu ka chhiar tlut tlut a, mahse i nuih ka tiza zo si lo. I lâwmna tûr a nih dâwn phawt chuan eng pawh, harsa mah se ka ti zêl ang. Ka zahawmna zawng zawng pawh hloh dâwn ila, nang ber ka neih che chuan ka lâwm tho tho ang. Nang i hlima i nuih theihna tûr a nih phawt chuan kei chu lo tap mah ila eng nge a pawina? I hlimna leh lâwmna lo liama thil pawimawh he khawvêl hian min hrinsak mawlh lo vang!

Midang vanga nuih ai chuan nangmah avanga ka tap thei hi ka lâwm a, nangmah avanga ka lungngai pawh hi ka hlim thin asin! Kan naupan lai khân kan infiam a, kan khûp te kan tihliam a, kan tap thin. Puitlin thuai thuaia hmangaih neih ve te kan châk a, tichuan kan lo puitling a, hmangaih te pawh chu kan lo nei ve ta a. Ka hmuhchhuah tâk erawh chu hei chauh hi a ni – Thinlung hliam ai chuan khûp hliam kha a lo nuam zâwk a ni tih hi! Ka tlin lohna tam tak i hmu a, ka tihlim zo lo che tih pawh ka inhria e. Ka theih tâwp chhuah mah ila i thinlung chu a to êm a ka lei zo mawlh si lo! I tel lo chuan ka tân khawvêl hi a thim a, ka thlarau hian riakmaw iangin chawlhna a van ruai thin asin.

En teh, kâwl lo êngin zîng khua a lo vâr a, sîrva ten zâi vâwrin hlimlai ni an chên a. Kâwl lo nguiin zan chhuak sa tinrêngten chu zân chu âm takin an chên bawk asin. Khawvêl hi a vir muai muai a, hlimna au thawm chu a thangkhâwk rum rum thin. Ka khawvêl zîm tê erawh tahna ruamah a chang a, chumi hmuna ka lungngaihna mittui chu pil dâwn dâwnin ka dai si thin. Ka rilru natna chuan min seh ngawt ngawt a, ka thinlung hliam keh sawm chu mi PAKHAT bakin a tuam dam thei hek lo. Chu chu NANG hi i ni, ka hmangaih i ni si a.

Ka hmangaih che tih i hria e, i hre mai pawh ni lovin i hmu ngei alawm. Ka duhthusâm hi nei thei dâwn ta ila nang hi ka nei ngei ang che maw le! Mahse, duhthusâm mai a ni a, tawnmang iangin a ral ta si!

Posted in: Hmangaihna