Eng tikah tak kâwl êng ve ang maw?

He thu hi ziak tûr ka ni lo asin! Mahse ka ziah a ṭùl si a. Mizoram ka thlîr a, a mawi ka tiin hahchawlhna hmu nuam tak zawng a ni. A chhûnga chêng Zofate inlungrualna leh thawhhona ṭha tak ka hmuh phei chuan lâwmin ka hlim lo thei lo. Chutiang hnuaia kan lo seilian hi mi vanneite ziahna buah chuan a tlar hmasa ber kan awh ngei ang le. Mahse maw... thil felhlel leh dik lo hian zung a va kai nasa tawh tak êm!

Thil tam tak sawi tûr nei mah ila, thil pakhat chauh sawi tûrin tun ṭumah chuan ka thinlungin min phalsak a. Chu chu eng dang ni lovin sawrkar Deptt. hrang hranga hna lâk dân chungchâng hi a ni.

A ni tak e, hmanni lawka RMSA zirtirtu hna kha bei nge sei rûn dung tiin ka dîl ve a. Zawhna min zawh te chu ṭha taka chhângin tiṭha ve viau chuan ka inhria maw le (ka inhriatna mai mai zawng a ni). Ka nuin “Mapui, ka ṭawngtaisak reng che a nia, i tling ve maithei asin” tia min hrilh te kha ka bengah a châm reng a, beiseina sâng tak nên ka lo nghâk ve a ni. Result a chhuak a, ka hming chu hmuh tûr rêng a awm lo, ka vui dâwn emaw in ti a ni maithei. Ka vui hauh lo asin.

A hnu ka thil hriat erawh chuan ka thinlung a vit a, ka thahrui zawng zawng hi a chhat ni berin ka hria. Kan ṭhiannu pakhat chuan tihian min hrilh a, an ṭhiannu pakhatin science teacher a dil ve a, hmeichhe dang pakhat nên an interview a, result a lo chhuah meuh chuan MIPA zuk tling daih a! Tin, ka ṭhian pakhat chuan a ṭhianpa tlin thu min hrilh a, “MNF a ni a, mahse a tling tho maw le” tiin phâwk deuh hru hian a sawi a. Kei chuan, party-ah a inhmang em tih leh hnaa a tlin theih dân ka zâwt a. Ani chuan “MNF party-ah chuan inhmang e. MNF ni mah se, Minister a be thiam a, Minister lehkha a nei alawm. Tu emaw tal Minister emaw, thuneitute emaw biak i nei ve em?” tiin min zâwt lêt a. Ka neih loh thu leh chutianga tlin ai chuan tlin loh pawh ka thlan zâwk thuin ka chhâng ta a ni.

Hei hi maw kan Zoram chu? Hna lâk dâwn apianga Minister/thuneitute lehkha neih tum ziah, tu emaw zâr zova hna hmuh tum tlat, mahni thiamna leh theihna hmanga hna zawng ngam lo, midangte tlawn ṭhin Mizo maw kan lo nih? MPSC examination conduct hi chu fair tura ngaih a ni hrim hrim a. Chutih laia Departments hna lâk dânin sawisêl a kai ziah leh duhsak zâwng kan tina êm êm te, Ministers leh thuneitute lehkhain thil a tithei êm êm te hian nuih zawng a tiza mawlh lo. Deptt. hna lâk chungchânga mi tam tak rilru put dânte hi a pawi asin. Tûnah chuan ṭhalai hna nei lo tam takin Departments-ah rinna an nghat ngam tawh lova, nghah ngamna chi pawh a ni bawk hek lo. Chhûngril lamah kan dik tawh lova, tu mah pawh hi kan inring tawh bawk hek lo. Sawi dâwn chuan sawi tûr a va tam tak êm! Ka sawi sêng lo ni mai teh se.

Dikna ngaina a, rinawmna fawng vuan tlattute tân hian eng tikah tak kâwl êng ve ang maw?

Posted in: Ram leh Hnam