KA FÂWP NING LO

Kum sanghnih leh paruk kâwl a lo ên meuh chuan Govt. Aizawl College-ah lût tan vein, ka chungah eng nge rawn thleng dâwn a, eng thil nge ka tawn dâwn pawh ka hre lo. Hetiang thil ropui lutuk hi ka nunin a tawng ang tih ngaihna rêng ka hre pha bawk hek lo! Kum sanghnih leh pasarih chu ka tân kum chhinchhiah tlâk tak a lo ni. A chhan chu, duh taka ka fawh ngawih ngawih tûr ka tawnna kum a ni tlat!

Class kal ka châk chhan pakhat chu maw, amah vang liau liau hi a ni. Lehkhazir lam a lang tlat lo. Hetiang êm êm-a ka lunglai hnehtu hi an vâng viau mai awm mang e ka ti thin. Class kal a nuam a, a bula awm chu a nuamin ka thlahlel ngawih ngawih thin. Mahse ka thiante tu mahin min hriatpui lêm lo, an hriat loh hian ka lo vei ve êm êm ringawt mai a ni. Mut mawh hnar mawhah ka nei a, ni hi ka tân chuan a tawi lua a ni.

Amah chu maw... Ih...ih... ka sawi ngam rih lo. Midangte thatna a zâra mi chaw bar ruala bar ve thei leh, mite hmai phih ruala phih ve thei hrâm hrâm tân chuan vâna rah ang chu ni êm lo mah se, arsi te nêna lênlai chênza ang a ni tho si. Mi kawmthlanga khawsa ve mai mai leh vaihlenhlo thenawm mai tân chuan a tina han tin chi niin a lang lo. Mahse vâl hi a zûnah chhâwl ang mai ni lovin pipu angin ka uai zâwk a, ka inthên ka inthên mai a ni.

Kum eng emaw chen chhûng zawngte khân ka lo lonely pui tawh che asin. Ka bei hi dawng hma hlek se'ng chuan 'chatuanin mangtha' tih a ngai dâwn si a. Tûnah chuan ka tân kâwla ni chhuak hi ni hlimawm a tling zêl tawh a, thimin mi nan vêl pawhin ‘zânin atân mangtha’ tihna atâna duhthusam a lo chang leh thin. Engkim hian awmzia a nei thar leh ta a nih chu! Chu chu eng dang vang ni lovin NANGMAH vang hi a ni asin.

Ka duhlai, ka fâwp ning lo che. Mahse hun hi kan tân hian chung Pathian khian a lo ruat tlêm lulai êm a ni. Dârkâr chanve êm pawh tling thathum lo hi kan hun neih chhun chu a ni mai si a. Kel phung tap chim hmu ang maia birh tlut tlut thei ka ni ve bawk si lo. Hun awm miau hek lo le.

Tûn thleng hian lungawi theih lohna pakhat ka la nei ta fo mai. I bula awm hi nuam ka ti a, ka lungawina ber i ni ka tih thin kha. Mahse ‘ti nge tûn thleng hian i ânka nêm ka la dawn ve miah loh? Thil nithei a ni lo rêng rêng, mak tak a ni! Duh thawh takin ka fâwp vawng vawng che a, ka ning ngai rêng rêng lo che. Mahse... i chhân lêtna ka dawng ve ngai si lo. Aw ka bawih ALU PAPAWR.

Posted in: Lawrkhawm