Biak ina mutthlûk

Kan sawi fo va, pulpit tlâng thleng thlengin sawi a hlawh a, a sawitute ngei pawh an muthlu leh fo thin. “Mutbu nên rawn tlu lût mai ta che” tih châkawm tak tak pawh kan kat nuk ta! “Thlamuang taka biak ina mutthlûk te chu, hmun danga awm ai chuan a tha zâwk hrim hrim alawm,” tia sawi mawi ni chuang si lova sawi pial thiam êm êm lah kan bâng hek lo. Bible atangin han zir dâwn ila – Bible an ziah lai khân tûna kan inkhawm ang hian an inkhawm ve ngai lo nge, temple-ah khân an muthlu ngai lo hrim hrim a, sawi ngaiah an ruat lo zâwk – ‘muthlu’ tih tawngkam kan hmuh chhun lah ringtute thlarau nun sawina lam a ni daih bawk si. Eng pawh ni se, ‘muthlu’ tih tawngkam hrim hrim hi a tha lam ai chuan a tha lo lamah hman a ni tlângpui chu a nih hi a.

Thenkhatin “Kum upa lam te chu an taksa a chak tawh lo va, an lo muthlu a nih pawhin an thiamawm alawm,” te an la ti ta deuh deuh. Tar chak lo mai bâkah natna avanga awmna hmun apianga muthlu nghâl zêl mite hi chu ka thiam khawp mai. Chu tih laiin biak ina inkhawm laia ‘ringtu muthlu’ hmuh tur kan tam ta lutuk erawh inenchian kan tûl khawpin ka hria. “Muthlu te chu kaitho leh ang che” tih tui taka sak zawh chiah te hian muthlûk hi zuk nuam bîk êm êm a.

A kum upa lam an muthlu nasa zual bîk a nih dâwn hi tia ka ngaihtuah laiin nula leh tlangvâl, nu leh pa, la valai tak tak te pawh ‘inti muthlu lo’ tak chungin an lo zanlai leh berh berh mai thin. Mutthlûk hi hna thawh rim luattuk avang te, mut theih loh (insomnia) neih avang tein a awm thin; chuti ang mi chu kan zîngah hian eng zât tak awm ang maw?

Bek vân chhawng vah leh hnâr kua vân ruahtui dawng zâwng leh tukkhuma ben chawrh châkawm taka kan mutthlûk bawrh bawrh lai hunah hian inah emaw, hmun dang awm ta ila, kan muthlu ve tho ang em? Tûn hma chuan inkhawm laiin ka muthlu ngai lo va, kum 2012 vêl atang khân ka chîng thar ta tlat mai; inthlahrung tak chungin ka lo muthlu leh thin. Muthlu thinte hi kan inthiam mawlh lo. Chuvang a nia, a tâwpa mi Amen ruala Amen ve thei tûra kan nghar mut kar thin ni!

America mite khu mutthlûk an hrât an ti. A chhan chu hna an thawk rim lutuk a, nikhatah darkar 6 aia tlêm an mut thin vang a ni an ti leh daih. Kan ni ve kher ang em? Upa tlara mi, hrisêl awm deuh deuh an mutthlûk laiin hrisêl lo deuh deuh te an ngharêp men kar a; paho tlara mi, a sek tha tha an kun lâwp lâwp laiin chepa rêp silfai tih tûr ang mite an lo khap ang fawk fawk a. Thalai tlara mite lah a hmai tlâng tha leh pian ‘zuk la’ zaih te an thlêk bâwk bâwk laiin “A ena tha a ti hle a,” tih thu tirinhlelhawmtute’n mit khap an theihnghilh ta em ni tih tûr khawpin an harh tha a. Nuho tlar lah biak dâwna dilna theh luh hmasak zet ngai âwm deuh deuhho ngaithla âwm deuha mang lama an lo inpen parh laiin “I rawn inkhawm peih hram elo?” tih hmêl pu deuh deuh te an harh hra bawk si.

Kum upat vang te, hrisel lohna avang te leh chhan hrang hrang avanga muthlu ai chuan ‘thatchhiat’ leh ‘inthlahdah’ avanga muthlu hi kan tam zâwk tlatin ka hria. Mihring hian chîn dawklak (habit) kan nei theuh a, biak ina inkhawm laia mutthlûk pawh hi kan habit zînga chhiar tel loh theih loh a ni. Duh ni ila, darkar 1 erh awrh hi chu kan meng hrâm hrâm thei ngei ang. Lu mennaah mah kan tlaivar thei a nia. “Muthlute chu kai tho leh ang che,” tih hla ang khân muthlu kaih thawhna tactic tha deuh kan ngaihtuah chhuah vat a hun ta khawp mai. Mutthlûk hi ‘sual’ tia han hmuh rau loh êm êm nghâl ngawt chu ka tîm ve deuh. Lal Isuan “Ka lama tang lo chuan mi do a ni,” a tih te, “Mi lâk khawmpui lo chuan a tidarh a ni,” a tih te nên huang khatah khung dâwn ta ila, “Mutthlûk hi sual ni lo mah se, thil tha a ni si lo va; chuvangin sual hnathawh chi khat chu a ni,” i ti mai teh ang.

Posted in: Lawrkhawm, Pathian Thu