HMÊLCHHE VANNEIHNA!

Hmêl ber a chhiat miau chuan dam man hi a awm lo ve thlâwt a ni ti r’u? Hmêl hi tehfung berah kan hmang fo a, mi kan biak pawhin an hmêl kan en zêl hi. En lêm lova kan chhân mai chuan inzah lohna lam rawng a kai ṭhin. Hmêl hian pawimawhna lian tak a nei a, kan nihna zawng zawng târlang lo mah se, eng emaw chen chu min pholang chiang alâwm.

Chuti ang khawpa ka lo hmêlchhiat tâkah chuan vui hmui put dâwn dâwn châng ka nei a, mahni induh khawp loh a na duh veng veng khawp mai. Amaherawhchu, vanneihna tam tak kan nei a ni tih erawh ka tlângaupui châk tlat.

1. Hmêl ber a chhiat tawh hi chuan zar buaitu kan nei tlêm nge nge a, nun a hahdam.
2. Hun thâwl kan ngah a, zirna, eizawnna leh thil tihna kawng hrang hrangah tihtak zetin kan ti thei a, kan tluang duh riau.
3. Hmêl tihṭhat teh vak kan tum lêm lo (a theih tak tak chuang loh tih kan hre si a), hmêlṭha erawh chuan insawisêl neuh neuh tûr an ngah bîk.
4. Hmêl hi ngaihzâwng leh nupui/pasal zawn nân kan hmang khât khawp – chhuan tûr awm chai hek lo. Hmêlṭha erawh chuan an hmang ve fo.
5. Hmêl berin ‘puak’ a tih si loh chuan chhûngril lam nun kan uluk a, chu chu mite rilru hneh nân kan hmang hlauh ṭhin.
6. Hmêl avanga mite lawm kan hlawh miau loh avangin zirna leh thiamna kawng hrang hrangah a chhuanawm ber ber nih kan tum tlat ṭhin.
7. Vawi khat chu nula chhe lo ve fê, to ve tak hi ka ngaizâwng pek alâwm. Mite chuan a hnênah “Engtin nge i duh theih, a hmêl ṭhat loh ve tehrêng nên” an ti ve fo a. Ani lah chuan min thlah thei lo ve khang lâng! A chhan chu hmêl chhuang lova nun kan chhuan zâwk vâng a ni.
8. Hmêl a chhiat viau a, nun a ṭhat si chuan mite hian min lo iai vak lo, chu vângin LUCK a chiang bîk nge nge.
9. Hmêlṭha ho aiin zûn (charm) kan ngah bîk riau! Hmêlchhia chu mite min duh chhan hi chhûngril a nih avângin dam chhûng a daih a, an zûna uaite hian uaina hrui an sât chat zen zen lo.
10. Hmêlṭhain 'ka hmêl ṭha a ni' tih an inhriat chinah chuan chapona tlângah an lo ding tawh ṭhin. Hmêlchhiain 'ka hmêl chhia a ni' tih kan inhriat chinah chuan kan INNGAITLAWM hliah hliah tawh mai ṭhin. 

Hmêlchhe vanneihna hi a ropui a, a chhuanawm a, hmuh theihah a innghat lo va, a ril a, a mawi a, a thlum a, a duhawm bawk a ni. Hmêlchhe hmêlṭhatna hmu fuh tawh rêng rêngin hmêlchhia an ti phal tawh ngai lo va, an thlah phal tawh ngai bawk hek lo. Nang leh keia hmêl hi lo chhe ve hle pawh ni se, lâwm hliah hliah tûr kan ni. Kan chhuan hi tisa leh thisen a ni si lo va, lang lo lama ṭhatna a ni zâwk si a. Ka hmêl chhiatpui zawng zawng te u, kan va hmêlṭha hlawm tak êm!

Posted in: Lawrkhawm