A la rei lo asin

Zak deuh si, nuam ti deuh bawk si khân inah kan lût a. Iptepui lian zetah mau thei ka ak lawr zuai a, nuam ti takin ka phawrh ta a. Thlêngah tihtak zetin ka bun ngat ngat a, nakinah chuan sangha pakhat, kut zungpui tiat vel hi a rawn tla thlarh a. Kan nui dar dar mai.

Thang pawhin khat mai duh tâwk loin hnih lai a liam pui dawn ruai tihah hian hmanlai chang tawh thawnthu hlui kha a thar leh thin. Ngaih avanga pawh kir theih si loh lunglen avanga lo hnai leh thei si lo hi tu khaw kha mahin kan theihnghilh phal lo a, lunglen changin mittui parawl pûrin kan nui leh vur vur thin.

Nghakuai chiah turin thiante nên kan chhuak a, lui dung zawhin li lian deuh kan zawng thla ngat ngat a, a tâwp a tâwpah kan inchiah ve ta far a. Man kan tum lo nge kan châk lo zawk, sangha kha rilru a la ber lo tlat alawm. Kut zungpui tiat pakhat chu ka man ve ta nawlh a, chu chu kan hâwnpui tâk, kan bun chhuah nawlh kha a ni.

Zân thla êng hnuaia tuikhur tui chawi te kha a va nuam tak êm! A rûka ngaihzawng, a ruk thoa min ngaizawngtute nêna tui chawi tluka nuam kha a awm lo. Vai hla ‘pardesi’ sa chunga kan han au tial ve riai ruai te kha a ngaihawm thin.

Thianzaho kan han riak khawm a, nula tih tham ve uaih tawh te nên kan mu tlar pût mai a. Kârah pakhat lek mu mah se, a rûka di ve te kha chu an hla duaiin a hriat. Midang hriat chi si loh, bula mut tir dân ngawt zawn lai te kha a va ngaihawm tak êm!

Zawbuang vehin kan vak chhuak a, mau hmun thelh hul maiah zawbuang chhûn mu kan han hmu hlauh mai chuh! A hmaa kan titi nasat tehlul nên, kan phun sep sep pawh tlangau au ang maia ring ni ta hian a hriat. Kan han kap pawp mai a, sairawkherh nen kan sai pawp pawp bawk a. A hmun a thelh nuam bawka sakhi hi ka inchan deuh ber mai. Kan petek zung zung a, zawbuang tân pawh tawh khirh ve tak tur kan ni. Nuam ti takin kan zâwn haw a, a rim lah chu a na phian lehnghâl.

Pawl sawm result a lo chhuak a, pass lawm nan ui kan talh a, nuam kan ti tlâng bawk a niang, duh aia tam kan ei a, ui sa kan rui ta a nih kha. Kan zawi ngiai a, kan mu hle hle mai ni.

Tuikhur (muvanlai tih hi a hming a ni) mawngah pipu kan suih a. A sâng tha bawk a, a inthên chuan ral lehlam kan hmu pha thei hial ang tih tur khawp a ni. Kan thianpa chuan intithu takin uai hmasak ber a chuh tlat a, kan uai tir ta alawm le. Tûn thlenga ka benga la châm chu a hla sak kha a ni; “Aw, Lalpa...” a ti a, kan pipu suih chu a vawi khat inthênnaah a chat ta mai! Kan thianpa zai pawh chu “...paaa...” tiin a zuih ral a, keini lah hmanhmawh baklêngin kan zuk tlan a. Kawr kamah thi lo a ruangin a mit a lo khap fak fak a, ka va han khawngaih tak êm! Eng sawi lo chuan tuikhurah kan hruai chho a, kan hawsan daih lehnghal!

Tum khat kan indo lem a, kan thianpa a tlu a, a bekah hmawlhte a bur vu mai. Kan va hlauthawng hman tak! Sairawkherhin kan indo leh bawk alawm. Khiang rah kan lo khawm sauh sauh a, kan inperh ta thin a nih kha. Pathian hi chu a tha ka va ti tak êm! Kan mitah te khan inperh ta ila, a del dawn chiang si a. Ka cousin chalah tak an perh a, a pawng ul lehnghal.

Mau bul kawm kan la a, vur tawlhna ang chi hian thut theihin kan siam a, leivungah kan tawlh ta thin a nih kha! A nuam a, a hlauhawm hle bawk. A chak fur fur thei sia, brake nei ve hek lo, a tawpah chuan kan inbun khâwm leh ruih thin.

Tum khat chu kan thianpa te cycle-ah kan chuang a, a hnungah min phur a, a tlan laiin chhuk rawh min tia, ka chhuk thiam si lo. Min chhuk luihtir a, a hnunga light an vuah chu ka ti tla ta! A hrehawm ka tih tawh tehlul nên ka hrehawmna tizual turin tlaiah chuan a pa-in a man min rawn chawitir ta zui. Ka va zak tak êm! A man kan pe a; mahse, nuam an ti lo deuh a niang, min rawn kir leh ta nge nge.

Infiam hi ka peih ve viau nachungin sikul chhunga infiam hi chu ka duh ngai miah lo. Tum khat chu volleyball hi room chhûngah an khêl a, ka thu ngawi reng a, ka chalah tak min ben khum a. Ka la ngawi reng. Ban hnuah ka nu-in min lo hmuak a, ka hmuh veleh ka tap ta vak mai a nih kha! Kan zirtirtu nula pakhat chhe lo deuh khân min duhsak teh tlat zuk nia! Tûn thleng hian a chhan ka la hre thei lo. Ka chhânna te kha paper a check hunin a pen khân a rukin a lo siam tha zeuh zeuh thin nia!

Ngûnnhnam lem (Thunder Cat ngûnhnam ang) thing hmangin ka pa-in min siamsak a, lo hal nikhua ram kan tum te khan kan pai chhuak a, inti pa tawkin râl khat atangin ram kâng kan thlir thin. Ram kâng thelh rual kan nih ve tawh hnu chuan zan thim thamah ram kang kan thelh a, kan thelh mih aiin thelh mih zawh loh kha a tam zâwk hialin ka hria. Kan thianpa pakhat chuan an in chung di te kha tui a lo leih huh vek zel. An him ta a niang chu maw?

Thawnthu hlui ziak ang mai ka nih laiin kha’ng hun kal ta te kha tunah hian ka bulah thleng mêk angin ka hre tlat. Ka bialnu hlui te kha ka mitthla a, ka ngai deuh tlat! A la rei lo asin!

Read more »

Nu nge pa?

Chhungkaw din chungchangah leh fanau enkawl danah hian nu nge pawimawh anga pa? Kohhran leh khawtlangah pawh hmeichhia leh mipa pawimawhna hi thliar thiam har tak a ni.

 

Khawvel thuhriltu ropui berte zinga mi DL Moody chuan “Khawvela nu zawng zawng hi ka nu ang chu ni sela, Tan-In hi a awm a ngai lo ang,” a tih hian nu pawimawhzia a tarlang chiang hle. 1 Korinth 11:3 chuan mipa pawimawhna chiang takin a tarlang- “Mipa tawh phawt lu chu Krista a ni.”

 

Mipate hi venpui ngai, khalh ngil ngai leh fuih phur reng ngai kan ni. Hmeichhiate hi hum ngai, puih ngai leh hmangaih ngai an ni thung. Mipain chhungkua a enkawl a, hmeichhiain chhungkua a khalh ngil thin. Mipain chhungkua a uap a, hmeichhiain chhungkua a kuah khawm thin.

 

Hmeichhe sualin fate nun kawng dik loah a nawr liam a, tan-in chaw atan a fate a barh lût thin. Hmeichhia, mahni pasal te lua nei lo chuan mit a nei lo a, beng a nei lo a, thluak pawh a nei hek lo. Chuti ang hmeichhia chu hmuh ngawt pawhin hlauhawm tak an ni.

 

Mipa sualin chhungkua a chawk buai a, talhfiak tel loin a vaw darh thin. Krista lua nei lo mipa chuan vanram kawng hmuhna turin mit a nei lo a, chhandamna thu sawi turin ka a nei bawk hek lo.

 

Chhungkaw nu leh pa kan nih chuan khawvela kan awm chhan chu chhungkaw enkawl hi a ni. Fate kawng dika hruai turin Pathianin kan kutah mawhphurhna a dah a. Chumi hlen zo lo nu leh pa chuan damchhan lungphum a phum lo a, thihchhan tlâk thihna ropui a hmachhawn hek lo ang. Thlân lunga thaikawi biahthu zâm zam tur thu thiltithei ziak turin a kut a tawi si a. Nu leh pa hi pawimawh zâwk an awm lo. Pakhatin a dai pelh chuan pakhat a hliam thin. Pakhat a hlim chuan pakhat a nui thin. Pakhat a tah chuan pakhat mittui a tla thin. Pakhat a lungawi chuan pakhat a tlai thin.

Read more »

Tha a ti êm êm a

Pathianin lei leh van a siam tirh khan ni nga chhungin thil tinreng a siam a, a ni ruknaah mihring a siam a. A thilsiam tinreng chu a en a, tha a ti êm êm a.

 

Bible-ah heti hian a inziak lo - Pathianin mihring chu a sum, a in leh lo, a lirthei, a thiamna, a hmêl thatna, a pian nalhna, a finna, a nihna chelh a en a, tha a ti êm êm a.

Pathian chuan mihring chhûnga Ama thaw – thlarau – chu a en a; puitling, naupang, rethei, hausa, mawl, fing, hmel chhia, hmel tha, rualbanlo leh rilru kim lo thlengin a en a, tha a ti êm êm a ni. Mihringte hi kan mihrinna bul tak thlarauah min en avangin tu mah thliar bikna leh danglamna neiin min en ngai lo.

 

Kan pawn lam lan dan te leh kan thil neih a en ngai lo a, keimahnia thlarau a dah chu a en zawk thin a ni. Chu thlarau chu duh taka a siam leh a pêk a nih avangin mi eng ang mi pawh ni ila, kan thlarau chu Pathian atanga chhuak vek a nih avangin a hlut zâwng a intluk vek a ni.

 

Mihring kan nih angin kan inzah tawn tur a ni a, kan inngaihsak tawn tur a ni. Pathianin mihring min en dan ang hian kan mihringpui te hi en theuh ila, intluk tlang vek kan nihzia kan inhmu thei ang. Eng ang mi pawh ni sela, mihring an nihna anga inzah tawna inngaihsak tawn hi kan tihmâkmawh a ni. Mihring kan nihna ang hian kan chhûnga thlarau awm hi inzah tawn ila, kan pâwn lam lan dan hian kan nihna leh hlutna a pho lang zo si lo. Chu nihna lang zo lo avang chuan tu mah inen hniam emaw inensan emaw a rem lo a ni.

Read more »

Kan tih a ni si lo

Ka lâwmna a ho nge, ka beisei a tlêm zâwk? Kohhran miten lungrual taka Pathian chibai kan buk han hmuh te hian he mihring thinlung lung anga sak hi a tuiral fo mai. Sualnain min bâwm ve reng thin mah se, thinlung chhûnga thatna chuan chunglam a thlîr fan a, chuvang chuan lâwmna hnuk a ulh tliak leh hnâwp thin.

Kohhran hruaitute, FO hruaitute hi kan en a, mihring ve mai bawk an nih bâkah famkim lo zingah pawh kan tehna dânah chuan famkimna rêng nei lo an ni mah zâwk awm e. Chuti ang mi chuan kohhran mite min hruai a, sawi leh sêl kârah phunchiarna te chu ruah angin an do hân châng a va tam êm.

Heng mite hian thlarau lama pûr kan châwkna tur kohhran hi an hruai thei mawlh lo. A thawktu chu Pathian a ni a, Ani chuan thlarauin min telpui a, hruaitute kut a tichak a, an khûp a tungding leh thin zâwk a ni.

Kohhranin tihtur a ruahman a, inkhawm programme a duang a, thawhlawm ip a siam a; hlawh phût miah loa phûr taka thawk thin, peih loh sawi loa inkhawm hrâm hrâm thin leh ui miah loa sum tam tak thawh duhna thinlung petu chu Pathian a ni.

Kan tih ni miah lo hian member-te thinlungah a THU chu min lo tuhsak reng si a. Thuchah nung mang lo taima taka ngaithla thin kohhran mite hian hruaitute aiin thlarau an chang nasa zâwk ni hialin ka hre thin. A sawitu inbuatsaihna tha hlei lo pawh thiltitheiin thinlungah min tihnunsak ta fo mai. Kan tih a ni si lo. Lalpa tih a ni.

Read more »

Nawhchizuar kha

Israel faten Jeriko kulh an tihchim dawna enthlatute inhumhimna ber nawhchizuar kha rilruah a bet reng mai. A hmel a tha-in a pian a nalh hle ang tih vel sawi thui ngai loin a hrawk châwmna khawp a thawk chhuak thei tih erawh hai rual a ni lo.

 

Thihpui tlâk khawp, lunga den hlum châkawm tak sual tia nung tlat si a ni. Israel fate a lo hum chhan kha chhandama awm a duh vang a ni ngei ang. Kha’ng hunlai khan Israel fate chanchin kha a thang nasa hle a. An hlau mai bâkah an hmelma lian ber a ni bawk. Ama nunna pawh zah zo loin a lo hum a nih kha.

 

Chhandama a awm nachhan ber chu a tukverha puan sen a târ vang kha a ni. An thenawmte khân kawr sen su-in an tukverhah lo pho ve ta se chhandamin an awm ve tho ang em tih vel chu chhui hman loah inngai ila. Kha puan sen avang khan a nunna leh a chi leh kuangte nunna chhandamin a awm a ni.

 

Puan sen kha Isua thisen entirna a ni. Huaisen taka a lo zar ngamna khan a chhandam a ni. Mihring kan nih chuan sualin min bâwm reng a. Mihring leh Pathian ngaiha thihpui tlâk sual ti kan nih pawhin Isua thisen hi huaisen taka târlang ngam tur kan ni.

 

Nawhchizuar khân a hnu-ah nawhchi a zuar chhunzawm zêl em tih hre lo mah i la, chhandam a nihna khân a nun a thlâk ngei a rinawm. Kan sualna te chu tenawmin mite hmuhsit pawh hlawh mah i la, Isua thisen avangin chhandamin kan awm thei a ni.

 

Nawhchizuar kha a nawhchizawrh a sim phawt a, puan sen a zar ta chauh tih kan hmu lo a, a sualna nên puan sen kha a zâr zâwk a ni. Sual sima fel leh thuawih taka nun a, smart taka inkhawm hnuah chhandamna chan kan inbeisei a nih chuan kan tisual dêr thei.

 

Kan sualna zawng zawng tlengfai vek turin Isua thisen hi a chak tâwk a, thil a tithei tâwk a ni. Hei hi ringhlel loin thisen thiltihtheihna hi hre nawn fo i la a duhawm hle. Isua thisen avangin chhandamna kan chang thei. Huaisen takin khawvel mite kârah kan sualna nên lam hian thisen thiltihtheihna hi kan târlan a tûl zâwk a ni.

Read more »

Chhungkua ka nei alawm

Sum tam tak nei mah i la, harsatna leh lungngaihna ka tawhin min hmangaih lêt ve dan a thiam si lo.

In leh lo ropui tak nei mah i la, ka rilru a hah hunin min thlamuan dan a thiam si lo.

Lirthei man to tak tak nei mah i la, thutlûkna siam tura ka buai laiin min tanpui dan a thiam si lo.

Thiamna sang tak neiin mi ropui tak ni mah i la, natna ka tawh chângin min enkawl dan a thiam si lo.

Ka bulah mi hausa leh ropui tak tak, mi fel leh fing tak tak awm mah sela, ka dam lohin ka dam leh thleng min buaipui peih ngai si lo.

Khawvelah hian mite angin nuam sa lo mah i la, ropui lo mah i la, hmingthang lo mah i la; kan ei khawp hmu hrâm hrâm pawh ni i la, ka bulah min hmangaihtu ka chhungte an awm chuan khawvel hmachhawn ka hlau ngai lo.

Thiamna sang tak ka neih vang te, sum ka ngah avang te, mite min ngaihsan avang te, ka fin avang te hian hmalam hun hmachhawn ka zuam a ni lo. Chhungkua ka neih avang chauhin hmalam hun êng ka nei thei a ni.

Chhungkaw pawimawhna hi ni tin inhrilh nawn fo pawh ni i la, kan la sawi chhuak zo lo ang. Eden huan atangin Evi leh Adama khan chhungkua an din \an a, mihring siamzia hi chhungkua atanga intan a ni. Chhungkaw tel loa nun hrehawmzia hi sawiin a siak awm lo e.

Chuti ang khawpa chhungkua a pawimawh a, a ropui si chuan chhungkaw belh tur nei lo riangvai te hian hmangaihtu an va ngai lehzual dawn êm! Anni tân hian nang leh kei hi chhungkaw pawimawh tak kan ni thei. An nun bul innghahna pawimawh tak ni turin heng mite hmangaihna thinlung neih i zir ang u.

 

Tu dang mah ngai loa ka hlimna chu ka chhungkua hi a ni. Ka hlau lo ang, chhungkua ka nei alawm.

Read more »

Sava leh a note

Naupan laia thangthleng leh thangchep kam thin, kângvara sava veh hrât leh zawbuang zâwn hawa savawm sa tui ti êm êm hian sava bu zawngin a pui chaw pu ka ûmzui ngat ngat thin zuk nia! Sava puiin a note a hauh natzia leh a hauh hrâm dân pawh hriat loh rual awm suh.

 

Sava hian a bua a tui an awp lai chuan an bulhnaiah kal ila hrâm miah loin an thlâwk chhuak phurh a. Hla lo te atangin an veng zui thin. Kan hmuh theih lohna tur berah an biru a, a bua a tui erawh chiang taka hmu thei siin a fu vân thin. A tui a lo keu a, a note a lo awm tawh chuan a pui hian an hauh na hle. An thlawh chhuah tawh ngat phei chuan an hauh na takzet.

 

Kristaa la piang lote hi Pathian hian awmpui reng mah se, NUNNA an la neih loh avangin a veng zui mai thin. Kristaa nunna nei tawh te erawh a hauh na a, hun rei tak rawngbawl tawh te phei chu a hauh na lehzual. Pathian hian Amah ringtute hi min hauh nat êm avangin kawng hrang hrangin min zilhhau fo a, mihring ngaiha natna te pawh min tuartir thin. Heng zawng zawng hi Pathian hmangaihna vang a ni.

 

Amaherawhchu, Joba nun kan en chuan natna leh harsatna hi Pathian atanga chhuak vek a nih loh zia kan hmu. Setana chuan natna hmangin min tihrehawm thei a, ‘marawhchu, heng zawng zawngah pawh hian Pathian phalna (permit) a tel ngei thin. Natna leh harsatna zawng zawng hi Pathian fiahna erawh a ni vek lêm lo. Keimahni tihsual avanga lo thleng te pawh a awm ve fo.

 

‘LALPA chuan a hmangaihte chu a zilhhau thin a ni, Pain fa a lawm apiangte a zilhhau thin ang hian’ (Thufingte 3:12). Pathian chuan faa a neih tawh te chu leia nu leh pain kan zilhhau ang hian a zilhhau thin. Nat chang awm mah se, kan tâna thatna tur a ni tih i hre fo ang u. ‘Ka hmangaih apiangte chu ka zilhhauvin ka thunun thin; chutichuan thahnem ngai la, sim rawh.’ (Thupuan 3:19)

 

Pathian fa kan nih tawh chuan a duh zâwng anga awm tur kan ni. A duh loh zâwnga kan khawsak chuan nu leh pain fate kan zilhhau ang hian kan chungah a thleng ve thei. Hei erawh hria i la, hmangaihnaah chuan natna awm mah se, a hnuah lawmna sawi sên rual loh a thleng leh thin.

Read more »