Member tlawh dân

Hruaitu nih chuan member tlawh hi kan tihtur pawimawh tak a ni a, hruaitu nih loh pawhin member active kan nih chuan kan zînga tel tam vak lote tlawh fo hi thil pawimawh tak a ni.

 

Member-te tlawh tur hian hun insiam a ngai a, kan hun siam dan tur erawh râl pui phiara phiar loin a hnuaia mi ang hian a ni ang. Kan thiante ina lên kan châk ang hian member-te ina kal hi kan châk a pawimawh. Peih lo chunga kal hian thatna awm bawk mah se, a sâwt mawh hle. Kan member-te hi hmuh kan châk tur a ni.

 

Member-te tlawh tura pawimawh deuh deuh te chu:

 

1. Ti khân pêng kawi nghal rawh. An ina lêng tur hrim hrima kal kan tum chuan hun a awm thei tak tak lo. Eng emaw tih pah te hian an in kal pêl mai loin pêng kawi thin ila, kan innel a, kan inpawh sawt thin.

 

2. Awm hmun thawmhnaw nen kal rawh. Member tlawh tur kan ni tih vanga smart taka inthuam hi a fuh ber lo. Kan tlawh tur te kha awm hmun thawmhnaw nen an lo awm a, keini smart taka kan lên chuan kâr âwl a awm nghal phawt. Inpawh taka kan inkawm theih nân awm hmun thawmhnaw nena kal hi a tha khawp mai.

 

3. Tawngtai kher tum suh. Tawngtai hi a tha; amaherawhchu, chhungkaw boruak te, inlêng an neih dan te enin tawngtai kher tum hi a tha ber kher lo.

 

4. In chhûng luh kher tum suh. Kan member-te kawta an lo thut chuan thutpui ve mai tur a ni a, pangpar tui an lo pe emaw thil dang an lo tih chuan an bulah dinga an thiltih lai sawipui mai hi member tlawh dan pawimawh tak a ni.

 

5. Nangma chanchin ni loin anmahni chanchin sawipui rawh. Keimahni chanchin kan sawi chiam hian kan kal chhan kan theihnghilh tihna a ni. An chhungkaw chanchin, an eizawnna, an zirlai leh an thiltih sawipui hi kan hmêl an hmuha an beisei hmasak ber a ni.

 

6. An thurûk hriat tum suh. Harsatna leh buaina eng emaw tak an nei a ni maithei. An hmêlah dik lo awma i hriat pawhin hriat chhuah tumin dâwp kher suh. Rin tlâk i nih chuan an hrilh mai ang che. Titi khawchâng sawi mai mai turin lêng zâwk ang che.

Read more »

Thlaraua Khat

Galatia 5:16 “Thlarau vah awm rawh u, tichuan tisa chakna chu in zawm dawn lo nia.”

 

Thupuan 3:20 “Ngai teh, kawngkhar bula dingin ka kik hi; tupawhin ka aw hriaa kawng a hawn chuan a hnenah ka lut ang a, a hnenah zanriah ka ei ang a, ani pawhin ka hnenah a ei bawk ang.”

 

Genesis 7:1 “LALPAN Nova hnênah chuan, "Nang leh i chhûngte zawng zawng chu lawngah lût rawh u; nang zawng tûn lai thangthar zîngah hian ka mithmuhin mi fel tak i nih hi ka hria che a ni.”

 

Rom 8:5-8 “Tisa dana awmte chuan tisa lam thilte an duh thin; Thlarau dana awmte erawh chuan Thlarau lam thilte an duh thin. Tisa lamthilte duh chu thihna a ni si a, Thlarau lam thil duh erawh chu nunna leh thlamuanna a ni; tisa duhzawng chu Pathian dona a nih avangin. Chu chu Pathian danin a awm si lo va, awm pawh a awm thei bawk hek lo a ni. Chutichuan tisaa awmte chuan Pathian an tilawm thei lo.”

 

1. Thlarau awmzia leh nihna:

 

(i) Pathian a ni a, zalênna a ni: 2 Korinth 3:17 “Lalpa chu thlarau chu a ni a; Lalpa thlarau awmna apiangah zalênna a awm thin.” Phuartu leh saltu awm lohna a ni. Zalênna hi a hlu êm êm a, zalênna sualtute chu kan ngaisang thin. Zalên kan ni hi thlarau hnathawh ropui tak a ni.

 

Nelson Mandela – Mi ngo awp behna hnuai atanga South Africa chhanchhuaktu a ni. Jail-ah kum 27 chhung a tang.

Martin Luther King Jr. – American civil rights movements (1950’s and 60’s) hun laia chi inthliarna duh lo pawl leh mi hang te zalênna tura nasa taka beitu a ni.

William Wallace – Scottish knight a ni a, English awp behna hnuai atanga zalenna sualtu a ni. First War of Scottish Independence (Battle of Stirling Bridge, 1297) hun laia an hruaitu huaisen tak a ni a, hnehna a chan hnuah phei chuan Guardian of Scotland nihna an pe nghe nghe.

 

(ii) Hriattirtu leh thutak a ni: 1 Johana 5:7 “Hriattirtu chu thlarau hi a ni, thlarau chu thutak a nih avangin.” Thlarau chu thutak a ni a, dawt a tel ve lo. Amahah chuan dikna leh felna a awm.

 

(iii) Fa tak nihna a ni: Rom 8:15 “Hlaua awm leh turin bawih nihna thlarau in hmu a ni si lo a; fa nihna thlarau in hmu a ni zawk e.”

 

(iv) Thiltihtheihna, hmangaihna leh rilru fel tak a ni: 2 Timothea 1:7 “Pathianin hlauhna thlarau min pe lo a, thiltihtheihna leh hmangaihna leh rilru fel tak neihna thlarau min pe zawk si a.”

 

(v) Tinungtu leh nunna a ni: Johana 6:63 “Tinungtu chu thlarau a ni, tisa chu eng mahaha a tlaktlai lo; in hnena thu ka sawite hi thlarau a ni, nunna pawh a ni.”

 

(vi) Pakhat a ni: 1 Korinth 12:4 “Thilpek hrang hrang a awm a, thlarau erawh chu hmun khat a ni.” Thlarau hi pakhat a ni a, mihringteah hna a thawk thin. Tunlaiin thlarau hi chi hrang hrang ang tein kan ngai thin a. ‘Rau’ hi kan hre thei lutuk em aw a tih theih awm e. 1 Korinth 12:9 hi chu thilpek sawina a ni.

 

(vii) Finna, hriat theihna, remruatna, chakna, hriatna leh Lalpa tihna a ni: Isaia 11:2 “Lalpa thlarau – finna leh hriat theihna thlarau, remruatna leh chakna thlarau, hriatna leh Lalpa tihna thlarau chu – a chungah a fu ang.”

 

2. Thlarau awm lohna:

 

(i) Sual a awm thin: 1 Samuela 16:14-ah chuan Lalpa thlarauin Saula a chhuahsan hnuin ramhuaiin a tibuai ta nghal a. Pathian thlarau awm lohna hmun apiangah sual a awm thin a, buaina nasa tak a thleng thin.

 

(ii) Fel leh that ngawt a tawk lo: Matthaia 12:22, 43-45 kan en chuan Isuan mitdel tawng thei lo hnen atangin ramhuai a hnawt chhuak a; ramhuai chu tui awm lohna hmunah te a vak a vak a, a tawpah a awmna ngaiah a va kal leh a, ruaka, phiah faia, chei mawiin a hmu a. Chu veleh a va kal a, amah aia sual zawk ramhuai dang pasarih a rawn hruai a, chutah chuan an lut a, an awm reng thin a; chu mihringa awmze hnuhnung chu, a hmasa aiin a lo tha lo zawk thin a ni.

 

(iii) Juda Iskariota: Isua bulah a awm ve reng a, amah hnaih takah a awm thin. Isua no a chiahpuia a biangah a fawp nghe nghe. Mahse, a tawpah chuan amah a intihlum ta a.

 

3. Thlaraua khat: Thlaraua khata kan awm theih nan engtin nge kan awm anga eng nge kan tih ang?

 

(i) Rinna an nei: Nova chuan Pathian a ring a, kum 100 chhung lawng tu a. Lawngah chuan tisa zawng zawnga thil nung tinreng zinga mi, sa thiang nu leh a pa tuak 7 zel leh a dang tuak khat, a nu leh a pa zel an awm a. Chaw, an ei mi zawng zawng te nen a dah a. Ni 40 leh zan 40 chhung ruah a sur a, chumi hnuah tui len hnuin lawngah kum khat leh thla hnih an awm leh bawk. Pathianin an mamawh a pe a, an rinna chu mal a sawm a ni.

Abrahama chuan a hmuh ngai leh hriat ngai loh ram a pan a. Compass a nei lo a, google map a awm hek lo. Rinna chiah a nei. Genesis 15:6-ah chuan Abrama rinna chu a felnaah Pathianin a ruat a ni.

Elija chuan rinna a nei a, mei a ko thla thei a ni (1 Lalte 18:38).

 

(ii) An famkim lo: Lal Davida kha Pathian thlaraua awmpui a ni a; mahse, a dai sual a, Pathian pawi nasa tak a khawih a ni. Mahse, thlarau a khat a nih avangin a tlukna ngaiah a tlu leh tawh lo.

 

(iii) Van an thlir: Tirhkohte 7:55-ah chuan Stephena chu lunga an den laiin van lam a en tlat a, Pathian dinglama Isua ding a hmu a ni.

 

(iv) Lawngah lût rawh: Genesis 7:1-ah chuan Nove leh a chhungte chu chhandama an awm theih nan lawngah an luh a ngai. Lawng kha tuk zo vek mah se, an luh si loh chuan chhandamin an awm thei si lo. Nang leh kei hi Isua lawngah kan chuan a ngai. Isuan chhandamna lawng chu Krawsah a rawn tuk zo tawh a, chutah chuan kan chuan ve a ngai a ni. Khawvel sual tlansan a hun ta! Tui let hun a hnai, thihna ruahpui a sur har lo ang.

 

(v) Thlaraua khat tur chuan nun ruak leh fai kan neih a, chutah chuan Isua kan chen tir a ngai. Chu nun chu keimahni ngawtin kan nei thei lo. Isuan min thenfaisak a ngai a, chu hmun ruakah chuan Isua chu kan sawm luh a ngai a ni. Bible chhiara zir tam, Pathian pawlna nun neih tam a pawimawh. Isua hi i nuna lut tura sawm hran a ngai lo, i nun kawngkhar a kik reng zâwk a ni (Thup. 3:20). Hawnsak mai hi kan tihtur chu a ni.

Read more »

Drip

Ka office thutna veilam tukverh ka hawi phei a, dam lo mutna ward chu khau hnah tlân ang maiin an lo tlim hmur mai. Khumah lah chuan natna bawh behin mi chi tin an lo tlâr pût a. A then an harh tha viau a, a then te erawh an hnuk zawmtu a sîn hle tih a hriat theih.

 

Chûng zingah chuan ka awmna hnaih bera mu chuan drip a khai mêk a, a drip khai lah chu a tui a eng deuh pup a, dam leh ngei se tih thlahlel ngawih ngawihin a bulah chuan a chhûngte an thu tlar bam bawk.

 

A nunna hnuk chu drip a khai mêkah chuan a awm ngeiin a lang. Chu drip chu phawi ta se, a nunna chuan a mangtha mai a ngai dawn si! A lungngai hmêl emaw a hlim hmêl emaw hmuh tumin han bih mah ila, a hmêlah chuan engmah hmuh tur a awm lo. A bula mite chuan an mittui an hru leh zauh thin a, an lungngai hmêl chu hawisan hrehawm siin hawisan loh theih loh a ni bawk si.

 

Thihna hi zawng a huatthlala mang e. Chatuana inhmu leh tawh lo tura inkalsan hi engmahin a hrilhfiah zo lo a, engmahin a thlamuan thei loa engmahin a tihlim zo hek lo. A karlehah chuan tukverh lam chu ka han hawi leh a, dam lo khum chu a lo ruak ta huai mai! Eng thil tak thleng ang maw ti chungin ka tlân phei a, nurse duty chu ka va zawt ta rawih a.

 

Ka hlauhthawn ang takin thihna kut vâwt chuan a lo man ta ni ngeia ka rin laiin dam takin an lo chhuak tawh tih thu ka hriat chuan ka thaw huai a, ka thin phu la inthum rawn tlut tlut chungin ka nui ta hrâm a.

 

Chu natna khumah chuan kei ngei hi mu-in ka inhre ta tlat. Ka pianin chu khumah chuan ka nuin na a tuar a, kei lah tap chungin khawvel êng ka lo hmu ve mêk bawk. Chu khumah chuan natna hrang hrang tlâk buakin ka mu fo a, ka thi dawn emaw ka tih laiin ka lo dam chhuak leh hrâm thin.

 

Ka thihna tur khuma ka mut laia ka dam leh hrâm theihna chu ka thisen zâmah damdawi drip ka khai vang a lo ni! Chu drip bûr chhûngah chuan damdawi danglam tak a awm; Isua thisen ngei mai chu!

 

Kan damna hi Isua Krista thisen avang a ni a, kan taksaa thisen hi sualin min ei zawhsak a, thisen tlachhamin natna khumah thichhâwngin kan mu fo. Chuvangin kan dam leh theih nan Isua thisen leh kan thisen zâm hi a inzawm reng tur a ni. Isua thisen drip kan khai reng loh chuan natna khum chu thihna khumah kan chantir mai dawn a ni. Sualin a fan chhuah thisen hi Isua thisen thianghlima kan thlâk vek a ngai a, chu chu kan tân damna famkim a ni si a.

Read more »

Pathian Kawng

Mihringte hi eng ti tura siam nge kan nih? Kan duh zawng leh nuam tih zawng anga mahni thu thua nung tura siam kan ni em? Thi leh mai tur kan nihna hian dam chhûng rei lote hi awmze nei taka hmang tur kan nihzia min hriattir a ni.

 

Isaia 53:6-ah chuan “Kan za hian berâm angin kan vâk bo a; mahni kawng kawngah kan peng theuh a,” tih ziak kan hmu. Mihring hian ama kawng a zawng thin a, ama thatna tur leh hlimna tur kawng a insial chawp thin.

 

Khawvel mi hlawhtling kan tih te hi a tam zâwk chu tumruhna leh taimâkna nêna mahni kawng sial kaw chawp a, chumi kawnga rinawm taka kal te an ni a, an kawng sialah chuan mi tam tak kalin a hnung an zui thin. He mihring kawng hi Pathianin keimahnia a dah thil ropui hai chhuahna pawimawh tak a ni. Mihring hi Pathian kawng zawh loa ama kawng chauha a kal hian a peng bo thin a, a tlu fo thin.

 

Hlawhtlinna kawng hi Pathian siam a ni a, hlawhtling tura siam mihringte erawh kan hlawhchham lawi si! Hei hi a chhan chu Pathian min sialsak kawngah taima taka kan kal loh vang leh kan hmaa harsatna te kan sut tlang ngam loh vang a ni fo.

 

Abrama chu Pathian kawng zawhin a hriat ngai loh lamah a kal a, rin tur dang tu mah a nei lo; amaherawhchu, a rin Pathian chuan kawng dikah a hruai ang tih a hriat chian avangin huaisen takin ke a pên a ni. Pathian kawng hi a lang fiah nghâl kher loa rinnaa dai chawpa fiah chho zêl a ni. 

 

Davida chuan Pathian kawng a zawh a, lal ropui tak niin Pathian rilru ang pu mi a lo ni hial a ni. A mihring ngaihdan a lal zawk avangin a dai sual a, a tlu a. Amaherawhchu, Pathian a auh vat avangin kawng dikah kal lehin Pathian kawng chu harsatna leh thihna hial a fapa chungah thleng mah se, rinawm takin a zawh zêl a ni. Pathian kawng hi a rual rem lo a, a bumboh a, zum leh hriam a tam a, mittui tlâkna ruam pawh a kat nuk mai.

 

Pathian remruat kawng hi thenkhat chuan tluang purh turah kan ngai. Pathian kawng hi a hnim a, a chhuk chho a, hlîng leh hriam tam tak a awm. Chumi kawnga kal te chuan hliam an tuar a, an tum ram thleng turin tuarna nasa tak an tâwk thin.

 

Pathian kawng kan zawh a nih pawhin kan thil tumah hlawhtling nghâl zêl tur leh tluang purh tura inrin hi a fuh ber lo fo. Beidawnnain min tuam hun leh hlawhchhamna kan chunga a lo thlen hunah pawh kan kawng zawh chu pen bosan mai loin rinawm takin zawh zêl ila, a tâwpah chuan a kawng sialtu Pathian nên lâwm takin kan intâwk ngei ang.

Read more »

Krismas Kristianna nen

Krismas hi Lal Isua Krista khawvel chhandam tura a lo kalna ni; ni pawimawh leh hlu tak a ni a. Kristiante tan phei chuan ni lawmawm bîk a ni. Hun a lo kal zel a, Krismas chu Kristian chauh ni lo, khawvel pumin an lâwm ta mup mup mai.

 

Hei hian Lal Isua Krista ropui zia a tilang a, a lo kalna hi khawvel mi zawng zawng tân a ni tih a tichiang hle. Khawvelin hun ropui taka a ngaih a nih avangin ring lo mite pawhin nasa takin an lâwm thin. An lawm dan erawh a dang thung.

 

Ring lo mite chuan holiday angin an lâwm a, an in leh lo nasa takin an chei mawi a, chhungkaw inhmuh khâwm nân an hmang a, intihthawvenna hun atân an hmang thin. Chuvangin an tawngkam lâr berah pawh ‘Happy Holiday’ tih an hmang nghe nghe.

 

Heng mite Krismas hman dân hi dem ngawt theih a ni lo. Holiday nuam tak angin an hmang a, thinlung takin Krismas min tâwmpui ve lêm lo thung. Isua pianna min lawmpui pawh a ni hek lo.

 

Tunlai Krismas kan hman dan en hi chuan happy holiday an tih ang mai hian tam tak chuan kan hmang ve ta niin a lang. Thinlungah Lal Isua pianna aiin intihhlimna a lian zâwk a, nau piang chibai bûk aiin chhungkaw inhmuh khawmna leh thiante nêna hlim taka hman chu kan duh tâwk ta niin a lang bawk.

 

Krismas kan hman dan theuh hi uluk lehzualin inenfiah ila. Lal Isua lo pianna ni a nih angin ngeiin hlim takin kan hmang tur a ni. Krismas hi kan Kristianna nen kan hmang tur a ni a. Krismas hi ringtu kan nih ang ngeiin thianghlim takin kan hmang tur a ni.

Read more »

A hmun dik takah

Sanghawngsei pui leh a note hi thing hnuaiah an bawk dûn a. A note chuan a pui hnenah "Enga ti nge thluk vûm kan neih?" a ti a. A nu chuan "Thlalera awm tura siam kan ni a, thluk vûmah tui kan dah khâwl a, tui dang tel loin rei tak tak kan awm thei alawm," a ti a.

 

A note chuan "Aw le. Mahse kan ke hi a seiin kan ke hmâwr te hi a kual bawk sia," a ti leh a. A nu chuan "Thlalera kalna atan a bîk taka siam alawm," tiin a chhâng a. A note chuan a ngaihtuah vang vang a, "Enga ti nge kan mithmul te hi a sei bik êm êm? A chang chuan ka mit a hliah fo mai," a ti leh a. A nu chuan "Thlalera thli thaw leh tiauvut lakah kan mit a vêng alâwm," tiin a chhâng leh a.

 

Sanghawngsei note chuan a ngaihtuah vang vang a, "Ka hre ta e. Thluk vûm chu tui dah țhatna a ni a, kan ke chu thlalera kalna tur bika siam a ni a, kan mithmul chu thlalera kan mit vêng tura siam a ni. Mahse, eng nge sahuanah hian kan tih?" a ti ta reuh a.

 

Kan thiamna leh theihna te hi awmna tur hmun dika kan awm chauhin hman tangkai theih a ni. A nih loh chuan hnawmhne ang lek a ni. I tangkaina tur hmun thlang thiam la, i awmna tur dik takah awm tum ang che.

 

Kan hlutna tur hmun kan thlan thiam a tul ang bawkin kan tana pawi tur hmun chu kan tlansan ngam a pawimawh hle. Hmun him ringawt kan zuan tur tihna ni loin kan chakna a bei tham a, hnehna kan chan theihna tur hmunah ngeiah rinawm takin i awm thin ang u.

Read more »

Thlarau hrisel

Hriselna hi kan ngaih pawimawh ber tur pakhat a ni. Mi, a hrisel loh chuan a hlim thei lo a, eng tih mah nuam a ti ngai hek lo. Pathian hian hrisel taka awm turin min duh a, kan hriselna tichhe zâwnga kan khawsak hian Pathian rilru kan tina a ni tih i hre thar leh ang u.

Thlarau hrisel nei tura pawimawh te:

1. Rilru hrisel – Rilru a hrisel loh chuan thlarau hrisel a neih theih loh. Midang rêl fo thin, biak ina lâm leh mai thei ang te hian rilru hrisel lo an pu tihna a ni. Rilrua midangte chhiatna ngaihtuah mi chuan thlarau bawrhsawm tak a nunpui ang. Midang chhiatna ngaihtuah kher loh pawhin midang ngaihtuahna nei miah loa khawsak pawh hi rilru hrisel lo tihna tho a ni.

Tita 2:6 Chutiang bawkin tlangvalte chu rilru fel tak pu turin fuih rawh.

Thufingte 29:23 Mi rilru inngaitlâwm chuan chawimawi a hlawh ang. 25:28 Mahni rilru thunun zo lo mi chu khawpui chim kulh nei lo ang a ni. 21:4 Mi indah chung leh rilru chapo, mi suaksual khawnvar hi sual a ni. 14:30 Rilru dam chu tisa nuna a ni a, itsikna erawh chu ruh mawihna a ni.

Sam 25:21 Ka rilru thatna leh ka diknain mi chhanhim rawh se. 26:1 Aw LALPA, ro mi relsak ang che, rilru tha tak puin ka awm si a. 26:11 Nimahsela kei zawng rilru tha puin ka awm ang: mi tlan la, mi khawngaih ang che.

2 Chronicles 19:9 LALPA tih chungin rinawm takin, rilru dik tak puin in ti tûr a ni.

2. Taksa hrisel – Taksa a bawrhsawm chuan rilru a nguai a, thlarau nun thlengin a nghawng thin. Taksa natna hian pawi nasa tak a siam theih avangin taksa hriselna hi kan ngai pawimawh tur a ni. Thinlung taka Pathian fak leh chibai buk tur chuan taksaah harsatna a awm loh a ngai a (rualbanlo an nih loh chuan), chumi tur chuan taksa hriselna kan ngaih pawimawh a tûl hle. Kan ei leh in kan uluk tur a ni a, insawizawi kan uar deuh deuh a tûl hle.

Ephesi 5:30 a taksa pengte kan ni si a.

1 Korinth 12:27 Nangniho hi Krista taksa chu in ni a a pengte in ni theuh bawk a.
 

Rom 12:1 Pathian khawngaihna avang hian, inthawina nung leh thianghlim leh Pathian lawm tlak ni turin in taksa chu inhlanah ka ngen a che u; chu chu in rawngbawlna awm reng a ni.

Read more »