MIN HNÊMTU THILSIAM TINRÊNG

1.        Thâl romei a zâm chii chiai e,

            Kan chhuahtlâng dum dûr kârah;

            Sirva zai mawiten min awi e,

            Chutin lung lâwmna min fah.

                        Suihlung lêngin khua chuan ila,

                        Hringfa zalêng zawngte hian;

                        Ka lunglai min hnêm zo lo va,

                        Min hnêmtu thilsiam tinrêng.

2.         A mâwi ngei e, tukloh ram dai,

            A thiang ngei e, siktui thiang;

            Nungcha zawngte rûnsâng an kai,

            An iang e, Seraf thianghlim.

3.         Khuangruahpui lo sûr pialleiah,

            Ka lunglai a vân ruai e;

            Thlifim dam te’n min lo awi a,

            Hnah nêm ten lâwmna min pe.

4.         Tûrnipui leh zân chhawrthlapui,

            Hrâm thiam nungcha lêng zawngte;

            Kei min hnêmtu lâwmna Nopui,

            Khuanu tân an hlu ngei e.

Read more »

LOVE THEORY

Pathian hmangaih te, nu leh pa, u leh nau leh thiantha hmangaihna lam thu kan sawi tum ber pawh a ni lo. He leia chêng mihring, nula leh tlangvâl inhmangaih kawngah hian khawvêl mihringte hian hmangaih hi pakhat chauh kan nei thei a ni.

           

Love at first sight : NO!!!... I hmuh veleh i hmangaih ta niin i inhria a maw? A ni lo. Chhia leh tha i lo hriat atang chiah khân i hmangaih chu a hmêl, a tawngkam, a nungchang, a pianzia, a hawiher, a khawsak phung leh pa i lo tih zia te, nu hnâp mai i lo tih zawng zawngte kha a lo intan daih tawh. Chhia leh tha i hriat tirh atang khân hmangaih chu i lo nei daih tawh tihna a nih chu. Mahse i hre lo va, i hmu mai bawk hek lo. Chutiang mi chu ka hmangaih a ni tih i hre lo, a chhan chu i thinlung chhûngrilah khân thuhrûkin a awm rauh rauh mai a ni. Tichuan chutiang mi chu i han hmu ta thut mai a le!!! Engtin nge i awm? Hmangaihnaah i luangliam a ni mai lo'm ni? Mahse a dik takah chuan hmânah i lo hmangaih daih tawh, i hre lo mai mai zâwk alawm.

           

Inneih hnuah hmangaihna a piang chawp thei in ti maw? A ni lo. I lo duh chawp ve chu a ni thei e, mahse i hmangaih chu mi pakhat chauh a ni. Chumi chu i têt lai atanga i thinlung chhûngrila lo inphûm ru, i hriat chhuah mai loh kha a ni. I haichhuak a, midangin a pâr mawi an thliah sak che chuan thu hran.

           

Hmangaih hi pahnih a neih theih loh rêng rêng. Hmangaih chu pakhat chauh i nei a, chu chu hmân atang tawha i thinlung chhûngril bera lo inthukru, i hriat si loh kha a ni. A hmêl i hmuh chiah khân phawrh chhuahin a awm a, i hmangaih ta hle niin i inhria ang. Mahse i hmangaihna chu a tir te atangin tan a ni a, i thih thlengin i hmangaih reng dâwn a ni.

Read more »

Hringnun

Nizan hmasa chu ka mu thei lova, ka hlau riau anih chu! Eng nge min mawlh ka hre lova, eng vanga chutia awm chu nge ka nih ka hre mai thei bawk hek lo. Ka nunah hian thil inphumru a awm a, ka hriat loh chu ka hre tlat a, ka sawi thiam si loh chu ka ngaihtuah nuap nuap thin. Mita ka hmuh si loh fiah takin ka hmu tlat mai peka, a thawm hriat tur awm si lo hian ka thinlung woofer hi a rawn chhem thum leh dup dup thin. Ka vawthlep rap beta pheikhai ka tuma chakna reng ka neih loh lai te hian ka ngaihtuahna chuan ka tlan chak ber a. Mahse,,, ka'n ti hram teh ang, a tak leh a lem (ngaihtuahna) a inmil thei si lo, ṭhap rual ka tum chang hian buhfai leh a hum ka thlei thiam mawlh si lo. Chu thil chu hringnun chu a ni. Eng tikah mah ka hrethiam thei ngai dawn lo.

Thih ka chak em em changte hian thih meuh chu ka ngam si lo. Huaisen taka ka inngaih lai hian ka dawih zia ka hre chhuak a. Mi zawng zawng ka chunga an ṭha emaw ka tih changin enga tan maha min ngai lo tawk lah bo lo. Chuvangin hringnun hi mahni chauhvin hmang mawp mawp ila, he drama-ah hian a changtupa ber i ni teh ang tia ngaihtuahna ka sen changte hian keimah chauh chuan engmah ka nih lohzia ka hrechhuak leh ṭhin.

Chuvangin a changtupa ngawt nih ka chak rualin a aia tih hmasak tur awmin ka hre ta. Chu chu a ZIAKTU nih hi a ni. Ṭha takin ka ziak anga, ka chang bawk ang a, ka direct bawk anga, a changtunu tur leh midang part play tur chu ka duh duh ka thlang tawh mai dawn a ni. Chuti chuan a hlawkna zawng zawng ka tel anga, a va hlawk dawn rua em!

Read more »