Wednesday, January 27, 2016

Fail-in bul ka tan



Mite angin nun ropui leh chhuanawm nei mah suh ila. Zah fâkah lu êm chhum suh sela, chapo lohna turin inngaihtlawmna chuan min tlâwm lul rawh se. Chhuan tur nei ni ila Isua chauh hi ka chhuan tur a ni si ang.

Hlauhawm tak leh mak taka siam ka ni si a (Sam 139:14) tiin Sam ziaktuin au-pui bawk mah se, kei zawng chuti teh uala hlauhawm ka ni hran lo a; chutih teh vaka mak pawh ka ni hek lo. Pathian min siam dân erawh a danglam bîk a ni tih hi ka pawm hmiah. Chumi avang chuan chakna ka nei a, min siamtu fakin a hnênah lawmthu ka thlen fo thin.

Kan nun bul tan dân hi a pawimawh êm êm a. Thenkhat chu duhawm leh chhuanawm tak a nih laiin thenkhat erawh zahpuiawm tak te pawh a ni mahna. Kei ngei pawh ka nun bul tanna chu a chhuanawm lêm loh hle. He thu ka sawi dâwn apiang hian insitna leh zahna hian thian atân min sâwm châmchi a, ka pawm châng te pawh a awm fo nia!

Anganwadi ka exam a, exam ka hmachhawn hmasa ber chu ka FAIL ta! Upate an nuih lo za lo sela, kan hunlai kha chuan anganwadi pawh a fail theih miau alawm. Ka zak bawk si, tihngaihna hre bawk si lo kha hrehawm tak a ni.

Ka nu nên kan zirtirtute inah kan lêng a, pass kan dîl ta! Naupang tê ni mah ila ka mitthlaah a châm reh thei lo. Min lo phalsak ve ta hlauh mai. Zak chung chungin pâwl 1 ka kai ve ta.

BA thleng tluang takin ka zir a; mahse, harsatna hian ka nunah kian ni rêng a nei lo a, buaina hian kan inthian thatna a tuai thar zêl si. BA 1st year chu vawi hnih teh tlawng ka fail leh ta! Beidawnna hian min kherh nasa viau mah se, ka nunah luhtir ka duh ngai lo a. Chuti ni suh sela, Beiseina Rûn hi ka lûm thei hauh lo ang.

‘Bei nge sei rûn dung’ tih chu thupui berah neihin ka han bei leh ta tâng tâng a, tunah zawng mite phâk lêm lo mah ila, rual pâwl pha tâwkin ka lo awm ve thei ta. A ropuina sawi tur hre lo mah ila, a lawmawmna erawh sawi tur ka van hauh lo.

Ka nun hi hlawhchhamna nên a inhne reng a, beidawnna nên a insi reng a ni. Ama’rawhchu, hlawhchhamna leh beidawnna hi ka inhnehtîr duh ngai lo a. Hlawhchhamna a lo len apiangin hlawhtling turin ka bei nasa zual sauh a; beidawnna a lo hrân apiangin beiseina nên ni thar ka chhiar fo thin. Fail-in bul tan mah ila, pass chungin ka hâwng si.

Pathian ta ka nih hnu pawh hian Pathian lakah ka fail ta fo mai. A duhzawng ti turin min hrilh a, a thu zâwm turin Bible hmangin min be thin. Mahse, ka fail zêl si. Chakna ka neih theih nân min tanpui a, huaisenna leh taimâkna ka neih theih nân min awmpui thin. Chuti chung pawh chuan he hringnun chak lo leh dawizep, thatchhia leh rethei tak hian ka la fail zêl si. Hemi avang hian beidawng ni ila, lui kawrah berh hnêng hnuanga ka leh châng a tam ang.

Pathian laka fail thin ni mah ila, Ani chuan kan pass theih nân min puih a hreh lo a, beiseina thar kan neih theih nân min kalsan ngai lo. Ni tin fail mah ila, ni tin pass tura kan beih a tûl si. Pathian hian pass reng turin min beisei lo a, fail chung pawha beidawng lo a, pass ngei turin min beisei zâwk a ni.

Kum tharah thil thar tel loin

 
 
Kum hlui ngaih mah a nat chuan kum thar zûn phurh chu a khîn viau ta ve ang. He dai ngai loh ram rehah hian ni tin hniak kan hnutchhiah leh dawn a. Khawi hi nge tûr pai hlo ni a, khawi hi nge damdawi pai tih tu man kan hre si lo. Naktuk mai ni lo, zanin mai pawh hi kan âr-khaw-thim-dai lo thei si lo.
 
Kum a thar apianga kan lo upa ve zêl te hian hlimna tam zâwk min thlen sela duhthusam a nih tehlul nên Pathian tel lo chuan phurrit belhchhahtu mai a ni si. Panlai nun hlimawm mitthlaah a châm a, enghelh nei loa tual kan chai lai te kha liam mai atan zawng a uiawm teh e.
 
Thenkhat chuan ‘kum tharah rilru thar nên’ kan ti a, ‘kum tharah chumi chu sim ka tum tawh ang’ kan ti fo. He intiamna hi kan hlenchhuah theih phawt chuan thil tha tak a ni. Nimahsela, pachhe-kum-tiam ang mai kan ni ang tih erawh a hlauhawm hle.
 
Thuhriltu-in “Ni hnuaiah hian thil thar rêng rêng a awm lo ve,” (1:9) a lo tih angin thil thar hi zuk awm hauh lo a. Kan intiamna leh hmasawn kan tumna te hi a nihna takah chuan kan neih sa reng kha a ni. A tha lo zâwk kan tih tlat avangin a tha zâwk chu a tawm-im ta tlat mai a ni.
 
Thil tha lo tam tak kan tih hi a tirah chuan tu man kan ti lo. Chu kan nun thianghlim tak chu kan nei sa reng a, hman chhuah mai tur a ni. Thil tha tihtur kan hriat ang apiang erawh a aia nasa zâwka tih kan tum tur a ni bawk ang. He kum tharah hian thil thar danglam tak tih tum kher loin kan neih sa reng kha a nihna ang takin hman chhuah i tum zâwk ang u. Chutichuan, keimahnia sual bet tlat te chu a tawm-im ang a, a ral mai dâwn a lo ni.


 
Design by Free WordPress Themes | Re-arranged by Lei hringnun