Friday, June 29, 2012

Hrilh mai rawh...

Nizân chu ka thianpa pakhat nên kan in text mai mai a, eng eng emaw kan sawi hnuin an vêng nula thenkhatin min * tih a sawi ta! Ka ka hau mai maw le! Ka awih chiah lo a, ka awih lo phal bawk si lo, ‘a nuam e, a hrehawm’ an tih ang deuh hian ka awm nia!

Isua ka an vêna lai tak “piahmang thatna leh hmêl mawina rêng rêng a nei lo va; amah kan hmuha amah kan duhna tûrin mawina rêng rêng a awm lo” tih ziak ang mai khân mawina leh thatna rêng ka nei lo a, mite min duhna tûrin keimahah hian duhawmna rêng a awm bawk si lo. Nulain min * theihna tûr khawpa hmêl tha ka ni lo tih chu ka thiante pawhin min Amen-pui thlap. Mahse, vêng thenkhata nulate chuan min lo * ve khang lang a nih chu.

Ka tân zawng a bâka lâwmna hi a awm thei hauh lo. Mut ka tum a, ka mu ngei alawm, mahse muthilh te chu khawi lamah. Zîng takah ka tho a, ka hawiher te chu zâng tak a ni, zâng tak. Tihtûr awm ang ang pawh phûr takin ka ti zo duak nia maw le! A chhan ni âwma ka puh thlûk tâk ber chu ‘Nula-in min *’ miau alawm. Nuam veng veng tak a ni!

Nula/tlangvâl kan * a nih chuan hrilh mai hi a lo finthlâk ber mai. Min *-tute pawh khân min hrilh zak tlat a, hun rei tak chhûng chu ka hre hauh lo. Chu chuan eng nge awmzia a neih? Ka hriat chiah khân min *-na khân awmzia a nei chiah si a. Chuvangin mi kan * emaw, hmêl tha kan ti emaw, duhawm kan ti emaw, zei hawi kan ti emaw a nih chuan hrilh mai hi a lo fuh ber. A zahthlâk hauh lo. A chhan chu tu mân fakna tawngkam (a der leh uchuak lutuk a nih loh chuan) hi kan haw ngai lo mai pawh ni lovin kan lâwm êm êm zâwk thin.

Zêp tlat ai chuan tlang taka hrilh tawp mai hian rah tha a chhuah zâwk thin. Chumi avanga inngaihzâwn emaw zuam êm êm tûr emaw tihna lam a ni lo. Mi puitling chuan lâwm takin an lo dawngsawng ang a, kan inkârah inpawhna (relationship) tha a awm zâwk ang. I mi ngaihsân, nalh tih, zei tih, hmêl tha tih leh fel tih êm êm kha zâm hauh lovin hrilh tawp rawh. A haw dâwn hauh si lo. Huat a hnêkin a lâwm zâwk dâwn zuk nia! A fel viau phei chuan thil a leisak/eitûr tui hnai tak a treat hlauh thei che asin!

Saturday, June 23, 2012

SOMETIMES

‘Always’ is no man’s nature
‘Sometimes’ is every men future

Sometimes sad, sometimes care
Sometimes fear, sometimes rest
Sometimes sick, sometimes fine
Sometimes fight, sometimes hug
Sometimes cry, sometimes smile
Sometimes war, sometimes peace
Sometimes close, sometimes open
Sometimes broke, sometimes love
Sometimes bottom, sometimes apex
Sometimes angry, sometimes happy
Sometimes failure, sometimes success
Sometimes discourage, sometimes encourage

There is no perfect ‘Always’
So, ‘Sometimes’ is ‘Always’

Thursday, June 21, 2012

Pangpâr awmzia

Pangpâr hian awmze thûk tak leh ril tak a nei a. Chû’ng a awmzia leh nihna te chu kan hriat ve a ṭha hle âwm e. Ngaihzâwng emaw ‘zâwng lo emaw hnêna kan duh duh pangpâr kan pêk ngawt hian kan relationship a tichhe thei a. Sawi kher lova kan thinlung chhûngril târlanna pawimawh tak a ni thei bawk. Tin, pangpâr hming ka hriat lohzia ka inhre chhuak a, Mizote hian pangpâr chi hrang hrang hming kan nei lo nual chu a nih hi a te ka tia! Dictionary leh search engine lama nasa taka ka zawn hnuah pawh ‘Ram pangpâr’ tih vel ringawtin ka hmu a. A hming phuah thiam tak te in awm phei chuan Mizo hming ngei han phuah thei ula, a va lawmawm lehzual dâwn êm!

carnation
Carnation (Derhken): Induhna leh induatna a entîr a, kan hmangaihte leh kan kawppuite pêk chi.

chamomile
Chamomile: Dawhtheihna a entîr a, hausakna thlentu niin an ngai. Kan mi duhsak zâwngte bâkah an hlawhtlinna kan lawmpuinâ’na pêk chi.

chrystometium
Chrysanthemum (Derhken): Hlimna a entîr a, ṭhian ṭha te hnêna pêk chi.

daffodil
Daffodil: Zahna (respect) lantîrna a ni. Nu-te hnêna pêk chi.

daisy
Daisy: Rilru thianghlim leh duhawmna a entîr. Farnu-te hnêna pêk chi.

forgetmenot
Forget-me-not (Kawldai): Hmangaihna tluantling leh inhriat rengna a entîr. Hmangaihte hnêna pêk chi.

geranium
Geranium: Inngainatna lantîrtu a ni. Hmeichhe duh rûk deuhte hnêna pêk chi.

honeysuckle
Honeysuckle: Thilphalna leh inpêkna entîrtu a ni. Hmangaihte hnêna pêk chi.

iris
Iris: Rinna, beiseina leh finna entîrtu a ni. Kan duhsak zâwngte hnêna pêk chi.

jasmine
Jasmine: Ngainatna a entîr a, hausakna a thlen niin an ngai. Kan mi duhsak zâwngte bâkah an hlawhtlinna kan lawmpuinâ’na pêk chi a ni.

lily
Lily: Ngainat loh zâwng entîrna a ni a, an mi hmuh duh loh te hnênah an pe ṭhin.

marigold
Marigold (Derhken): Thlamuanna a entîr. Accident tâwk emaw, damlo emaw, chhiatna tâwkte hnêna pêk chi.

orchids
Orchid (Naubân): Hmangaihna a entîr. Nula ni lo, nu hmelṭha tak hnêna pêk chi. Chinese ho chuan fa tam tak nei tûra induhsakna entîrnâ’n an pe ṭhin.

poinsettia
Poinsettia: Hlim tûra induhsakna leh hlawhtling tura induhsakna a entîr. ‘Christmas Star’ ti te pawhin an sawi a, Krismas nêna suihfintu hmasa chu Mexican niin an sawi.

red rose
Red Rose (Rose sen): Hmangaihna lantîrtu a ni a. ‘Ka hmangaih che’ tihna tluk a ni a. Hmangaih tak te hnêna pêk chi. Chhûngkhat laina hnaite hnêna pêk chi a ni lo!

Monday, June 11, 2012

Mite chuan...

  1. Mite chuan sum tam tak nei mah se tlâkchham an hlau a. Keini erawh chuan ni tin ei khawp kan tlachham lo va, a bâk chu Pathianin min ngaihtuah zêl ṭhin.
  2. Mite chuan thil ṭha pui pui an neih hian “Lalpa zâra ka ta” an ti a. Keini erawh chuan natna leh lungngaihna kan tawrhte hi “Lalpa zâra ka ta” kan ti ve ṭhin.
  3. Mite chuan a nuai bîin khawvêl an chên a. Keini erawh chuan nundân dik takin khawvêl kan chên ṭhin.
  4. Mite chuan thih an hlau a. Keini erawh chuan kan Pa hnên thlenna kawng a ni tih hriain hâwn hlân kan nghâkhlel ṭhin.
  5. Mite chuan khawvêl hi tâwp thei lo emaw tiin ropuina an zawng a. Keini erawh chuan tlâwmna nun kan zawng zâwk ṭhin.
  6. Mite chuan mahni ṭânghma haiin hlâwkna zawng zawng têl an duh a. Keini erawh chuan midangte tâna beiseina thar siam a, malsâwmna thlen kan tum ṭhin.
  7. Mite chuan mawi loh an hlau a. Keini erawh chuan mite mawina kan zawng zâwk ṭhin.
  8. Mite chuan lansarh an duh a. Keini erawh chu pindan chhûngrilah kan ṭawngṭai ṭhin.
  9. Mite chuan chawimawi nih an châk a. Keini erawh chu midangte chawimawitu nih kan tum ṭhin.
  10. Mite chuan hahdam taka thawh a, tam tak hlawh an duh a. Keini erawh chuan kan thawh phu chauh hlawh kan duh ṭhin.
  11. Mite chuan hming ṭhatna zawng zawng khum an duh a. Keini erawh chuan hmingchhiat pawh pawisa lovin dikna kan ṭan ṭhin.
  12. Mite chuan thil ṭha lo ti ṭhin mah se. Nang leh kei chuan thil ṭha chauh kan ti ang.

Wednesday, June 6, 2012

TISA CHÂKNA



Mi pangngai nih chuan tisa châkna hi chhuah châng a awm lo thei lo. Chu chu sual a ni hran lo va, dan beh hleih theih pawh a ni bawk hek lo. ‘Mangpui’ kan tih te pawh hi taksain a ṭûl a tih hunah min mantir mai a, tu nge ka duh lo ti thei che u?

June ni 6, 2012 chu zîng aṭangin ruah a tla cherh cherh a, ‘Transit of Venus’ ni tak a nih avangin khaw chhia pawh chu a huatthlala lehzual hle a, ruah sûr kârah chuan office kal tûrin nihliap nên ka inhawl chhuak ta a. Sikulpuikâwn bus stand ka thlen chuan a maka maka tam mipui an lo tlim hmur mai a. Bus a lo thleng a, luh kan inchuh a, kei lah pek chu a chuhhel helah ka la ṭang zui!

Chutia bus chhûngah tâwt taka kan din tlar lai chuan ka hma chiahah hian nula pakhat, ngo ving veng leh hmêl fel tak hi a rawn ding zân mai a. A tâwt êm avang chuan a sawi mawi dân berin sexy takin ka pawm tâwk chiah a. Chutichuan ngai teh, kei, kohhran ṭhalaiah pawh hruaitu ni ve hial hi ka lo pa mah mah a nih chu! Bus lah chu a tlân hur ang reng phian a, duh lo chung chunga ka dêp ka dêp tak kha, nuam lo veng veng tak a ni. Ani lah a che deuh sek a, a chet dân lah chu a ‘eng emaw’ riau lehnghâl! Thil dang ngaihtuah ka tum ngial pawhin ka thei hlawl lo, ṭawngṭai te chu khawi lamah, har tak a ni! Ka thin a phu zawih zawih a, ka âwm chu a hnungzâng nên a inhnêk rem êm avangin ka thin phu pawh chu a hre ve ngeiin ka ring. Zak viau mah ila zahin awmzia nei hek lo le, confi. takin ka dêp ta ngawt mai a ni!

Kei, tlangvâla pum pa, ruihtheihthil leh zûk leh hmuam ti lo, hrisel ṭha leh in-fit ṭha ṭeng ṭawng hi ka khûr ru der der nia maw le! Ka ‘thil’ chu control tum viau mah ila har tak a ni, a rawn tho ṭial ṭial a, a harh vang hma phian lehnghâl! Tawlh sawn ka tum lahin inchi 1 pawh ka che sawn thei dêr si lo. Chuti ang chuan dârkâr chanve vêl chu ka dêp ta a, huizzz!!! Traffic jam-a kan tân rei deuh hnu chuan a ṭhiannu nên an chhuk ta a, ka thaw huaissss. A thaw ve huai dâwn nge, ui tak chungin a chhuk tih chu ka hre chuang law.

Mipa tisa châkna hi a chhuak hmâ a, îtna te pawh hi mipa lam chan deuh bîk a ni. Hmeichhia erawh mithiam te sawi dânin minute 20 bâwr vêl han khâl hnu hian an tisa châkna a chhuak ve chauh ṭhin. Tisa châkna hi insum theih a ni a, eng emaw chen chu dan theih a ni. Ka sawi duh tak zâwk chu mi pangngai kan nih chuan dan rual lohva a lo chhuah hun a thleng ṭhin, chuti ang hunah chuan eng tin nge kan awm ang a, eng tin nge kan tih ang tih hi zir ngai tak niin ka hria.

Tisa châkna mahnia hrîkthlâk (Masturbation) hi sual a ni em? Ṭhenkhat chuan ‘sual’ an ti ang a, ṭhenkhat chuan ‘sual’ an ti lo ang. Pathian thu aṭanga en chuan tisa châkna (khawvêl thil duhna, inngaihna, bawlhhlawhna leh hurna) hi tlânsan tûrin min ti (Rom 13:14, Gal. 5:16, 1 Per. 2:11). Ka thil tawn pawh kha Pathian ngaih chuan thinlung lam uire ka ni dêr tawh (Mat. 5:18). Pathian thu hi chu a har a ni!

Tisa châkna kan tih puitlinna kawng khat chu mahniin a ni. Bible-ah lah masturbation lampang ziak hmuh tûr a vang phian lehnghâl. Chuvangin chhânna dik tak ka pe thiam hauh lo, mimal ngaihdânah thui tak a innghat a, Kohhran ngaihdân pawh hriat ve a hun tawh khawp mai (Kohhran chu Krista taksa a ni si a). Tûn thlenga kohhranin heti ang lampang hawi thutlûkna fel tak a la siam lo hi chu a pawi tak zet a ni.

A pawimawh ber chu “Ni tin Lalpa nên” tih thupui hi vawng reng ila, thlêmna kan tawh rualin tlân chhuahna kawng kan hmu thiam zêlin ka ring tlat a ni. Lal Isua nên engkim a ropui \hin.

Saturday, June 2, 2012

Mi fate’n an tuar asin

Kan tûnlai Zoram khawvêl hi ka thlîr ṭhin a, lungawina zawn ngial ka tum pawhin ka lung a chhe leh tlat ṭhin. Kan ram kalsiam hi a bilhah a tho lo tih chu tu mân kan hai lo. Kan hruaitu hmasa te khân thil an lo tisual nasa hle mai kan ti a ni hran lo, tihsuala mual mual chu an nei ngei a, tûn huna mite pawh hian tihsuala mual chu kan neih ve nual tho hi. Kan tihsual zînga pawi ber mai leh nghawng nei lian ber mai chu thil ṭha lo kan hriat reng pawh siam ṭhat kan tum lo hi a ni.

Kan rama politics lo luhna te kha hmân ni lawk tak tak kha a la ni a, tûnah chuan patling tap hnung puaka titi pawhin politics thu-khaw-châng bâk sawi tûr an hre meuh tawh lo. Politics kan hriat dân lah chu a ṭha lo zâwng (pessimistic view) a ni zêl lehnghâl. Ei leh bârah lah intodelh a hnêkin kan ṭâm tulh tulh emaw tih mai tûr a ni a, tuialhthei man a sâng a, a nghawng chu kan hria, anṭam man thlengin a sâng ve zêl mai si, a tuartu chu miretheite bawk kan ni leh ṭhin.

India sum hlutna a tlahniam nasa a, Rs. 56.50-in US Dollar 1 a hen pha ṭâwk. Indian GDP lah kum tam tak chhûnga a tlâk hniam ber ṭum niin, 9% thleng pha ve mai dâwna a lan laiin 5.3%-ah a tla leh dawrh a. Central laihrui ringa dam ve ṭâwk ṭâwk tân chuan a luhai thlâk ve viau âwm e. La piang lo na nâ nâ chuan nu thisen leh chaw ṭha an ring ve a, piang chhuak tawh erawhin laihrui tichatin mahnia nunna an lo nei ṭhin. Kan ram pawh hi kan piang tawh a ni lo’m ni? Central sum ringa inchhek arbâwm bânsanin mahni kea din a hun ve tawh khawp asin.

New Land Use Policy (NLUP) beiseina kâwl êng kan thlîr a, ṭhenkhat tân erawh beiseina beidawn thlâk mai a nih châng a tam. NLUP bâwng chhan hrang hrang avanga thi ta te hi Ministers, Directors, Secretaries leh mi hausa pui puite hian a nghawng an tuar ve hauh lo vang, an tawrh theih dân ber chu tûna Ministry chang mêkte hi inthlan leh hunah an dinhmun a tiderthâwng maithei tih chauh a ni. Hêng thiltihtheihna (power) neiho leh sum leh pai avanga mi chunga lêngho hian mi dam khaw chhuahna tûr ang chi (NLUP, centrally/state sponsored schemes, adt.)-ah hian eng pawh lo thleng se harsatna an tâwk ve mang hauh lo, mi fate erawh chuan an tâwk asin.

Kum 2010-2011 chhûnga SSA sikul naupang 1,85,789-te tâna uniform leina tûr chêng nuai 743.16 lai mai a lapse tih chungchânga thu inchuh te hian ngaihtuah a va tibuai tehlul êm! Kum 2 kalta chhûng khân sum awm reng si eng vangin nge an hman loh? Mahni tân an buai lutuk a, midang an ngaihtuah hman lo em ni? Heti zozaia tam sum hi kan ta tûr emaw kan fate ta tûr emaw ni ta se, kum 1 pawh tling loah kan peih fel hman vekin ka ring. Kan tân hamṭhatna a awm dâwn loh vang em ni, a lo thlâwna sum bâwmah kan dah hmuar mai le? Kan ngaihsak loh a leiah mi fate chuan an tuar asin.

Sikul naupang nuai chuang laiin an dawn tûr hamṭhatna an han dawng thei lo ngawt te hi ram hmangaihtu thinlung aṭang chuan a âwm lo hliah hliah a, lai a nâ a ni. Mi hausa pui pui fate chan tûr chu a awm ve lo maithei, anni fate zawng foreign-ah emaw phai lam sikul ṭha zâwkah emaw an zir daih âwm si a. An faten an tuar ve dâwn loh mai avanga an ngaihthah a nih ngat chuan ram tân hmêlma hlauhawm tak an ni ngei ang. Ni tin eichawp zawnga inhlawhfa ṭhin leh neih thinglung khâwng tak meuha fate zirtîr ṭhin tân chuan hêng hamṭhatna luang ral mai tûr hi chil lem dawk dawkin kan thlîr liam lo thei lo. Keini’n tuar lo mah ila, mi rethei fate erawh chuan an tuar asin.

Sawrkâr office hrang hrangah pawh hna pending hi a va tam thei tak êm! Kan ni tin hna a nih avangin kan peih leh kan thawk ṭha a, kan peih loh leh kan lênsan/mutthlûksan a, ṭhahnem ngaihna leh tihtak zetna rilru pu lêm lo hian kan inpêl sup sup mai em ni? Vawiina tih zawh ngei ngei tûr tih order a chhuah loh mai avanga ni tam tak hnua tihzawh kan tum kher te hian midangte tân harsatna a va siam nasa ṭhin tak êm! Keini’n tuar lo mah ila, kan hnathawh ṭhat loh man hi mi fate chuan an tuar asin.

Kawngpui chhe taka siam a nih hian a siamtuten sum hailût hnem mah se, mi fate chuan an tuar asin. Tui, gas leh electric current-a harsatna te hi a tuar nasa ber tute chu mi retheite bawk kan ni. Mi hausate pawhin an tuar ve ngei alawm, an tawrh dân erawh duh tâwka chen tûr an nei lo mai chauh a ni. Mi retheite chuan heti ang hunah hian zan rei pawh sawi thei lovin tui an chawi a, gas chan loh palh phei chuan black-in cheng 1,000 chuanga lei a ngai a, electric current awm ṭhat loh avanga mawmbati (candle) leina ngawt pawh hi mi tam tak tân chuan uiawm tham a tling ngei ang.

Ram hruaitu dik tak chuan hmangaihna thinlung nên ram a hruai tûr a ni a, mite harsatnaah amah a inbarh lût ve ang a, a dâwm chhuak ngei tûr a ni. Harsatna leh buaina a lo thlen rêng rêngin mi chunga lêng te hian an tuar nêp bîk a, rethei fate erawh chuan an tuar na ṭhin. Upa-in “Mahni ṭhenawm do ai chuan khaw sarih do pawh a thlanawm zâwk” an lo tih angin he kan Zoram zîm têah hian inṭhenawm khawvêng vek kan ni a, kan ṭhenawm te tawrh pawh pawisa lo va keimahni chauh kan inngaihtuah chuan eng tikah mah dinchhuahna kâwl a êng hauh lo vang.

Mizoram hi kan hmangaih a nih chuan mi fate tawrh hi kan phal tûr a ni lo va, an ṭhatna tûrin kan thawk zâwk tûr a ni. Midangte hamṭhatna dawn tûr ang chi rêng rêng a rang thei ang bera pe ṭhin mite hi ‘Hruaitu ṭha’ tiin khawvêlin an hming a chhinchhiah ṭhin a, mite fak leh chawimawi an hlawh bawk ṭhin. Mi hausa leh thiltithei tlêm tê te chawimawi nih ai chuan mipuite (mass) chawimawi hi a tlo a, a hlu ber bawk.

Ponyo & Totoro

Cartoon/Animation lampang ka ziah avang hian naupang chhia viau tûrah min ngai bîk lo ula. Tlangvâl, nupui neih rual lutuk tawh, mahse neih tûr ber la thlang fel thei lo mai chauh ka ni tih ka sawi hmasa duh.

“Ponyo Ponyo, nghate duhawm te...” tih hla leh “Totoro, Totoro, Totoro...” tih hla hi kan hre lâr hlein a rinawm. Naupang chauh ni lovin puitling tân pawh a hmuhnawm tih phat rual a ni lo. Cartoon a nih avang hrim hrima hmuhnawm a ni lo va, a hmuhnawmna chhan ber chu a story hi a ni zâwk.

Ponyo film atanga kan zir tûr:
  1. Sosuke naupang kum 6 mi vêl lek niawm kha puitling leh rintlâk tak a ni tih a hriat theih a, naupang tê tê te pawh hi zirtîrna a that phawt chuan an lo puitlingin an rintlâk thei khawp mai.
  2. Sosuke naupang tê khân a pa biaknâ’n light signal kha a hmang thiam êm êm. A nu leh pa zirtîr vang a nih a rinawm. Nu leh pa eizawnna kawngah hian naupang te pawh hian pawimawhna an nei ve a ni.
  3. Tar chak lo zâwkte ngaihsak an tûlzia a lang.
  4. Ponyo hmangaihna kha a ropui thlâwt! A thiltihtheihna zawng zawng pawh hloh inhuamin Sosuke a zui. Hmangaihna awmzia a lantîr chiang hlein ka hria.
  5. Tui lian te, thli tleh te leh ruah sûr te pawh kan tâna thatna tûra hmanraw pawimawh tak a ni thei tih a lang bawk.
Totoro film atanga kan zir tûr:
  1. Unau inhmangaihna thûkzia a lang.
  2. Nu leh pa chauh ni lovin naupangte hian nu leh pate hi an ngaihtuah ve thei viau asin.
  3. U ten naute an ngaihtuahzia a lang a, a tûl chuan an hau bawrh bawrh mai thin, mahse an hmangaih vang chauh a ni.
  4. Mei-i bo avanga a u manganzia kan hria a, a tâwpah tap chunga a ngen avangin Totoro-in a tanpui tih kan hmu. Keini pawh hi mangan tâwpah chuan kan tawngtaina leh kan ngenna hi Pathianin min chhâng thin tih a lang chiang hle.
  5. Mizo khawtlâng nun a lang telin ka hria. Mei-i bo chungchanga an khawtlâng mite tanrualzia kha a ropui a, tûnlai mite hian entawn tûr kan nei ngeiin a rinawm.
Korean film-te pawh in en thin ngeiin a rinawm (kei zawng ka en ve ngai hauh lo). Korean film atanga zir tûr pawimawh deuh nia ka hriat tlêm azâwng ka’n târlang ve ang e. 1. An thianghlimna leh an invawn ulukna, 2. A changtute hi a tlângpuiin company manager emaw, hna tê tham deuh thawk emaw an ni tlângpui, chu chuan thalai hna thawh nei lo an awm mang lo tih a lantîr, adt.

Kan thil en rêng rêng hi a hmuhnawmna mai piah lamah a zirtîr leh zir tûr tha hi hmu chhuak thiam ila a duhawm hle, chu chu TV en hlâwkna ber tûr pawh a ni. Hmuhnawm ti tak chunga thil tha kan zir chhuah bawk chuan chu bâk bâka thil tha a awm thei chuang lo. Ponyo leh Totoro film-te pawh hi naupang kan enpui laiin thil tha zir tûr lo lang te hi hrilh nghâl zel ila, nakin lawkah an la rawn nunpui chho zêl dâwn alawm. HPC(D) te pawh hian an naupan laiin heng film-te hi en ta se, an nu leh paten kan târlan ho khi hrilh nghâl zêl ta se, ‘unau hmel hai’ tih vêl hi chu a awm lo maithei asin!


 
Design by Free WordPress Themes | Re-arranged by Lei hringnun